A portavoz nacional do BNG, Ana Pontón reclamou hoxe “unha fiscalidade propia para os montes en man común” no encontro con propietarios e propietarias de montes veciñais celebrado no Auditorio Municipal de Vilagarcía de Arousa.
Para a portavoz nacionalista, os montes veciñais en man común cómpren unha importante función social e manteñen un carácter de propiedade colectiva singular que os diferencian dos montes públicos comunais de Concellos e entidades locais menores.
Unha cuarta parte do territorio galego con máis de 700 mil hectáreas corresponde a monte veciñal de propiedade comunal. Na actualidade, dixo, existen cerca de 2.800 comunidades de montes que demandan dotarse dun “órgano específico” para atender ás necesidades da propiedade comunal e condonar as débedas “falsas e inxustas dos montes veciñais”.
Pontón trasladou ao colectivo de propietarios de montes a proposta do BNG aprobada recentemente no Parlamento galego para poñer en marcha unha liña de axudas a comunidades de montes para dotalas de planos de ordenación forestal e selo de certificación forestal.
Pola súa parte, as comunidades mancomunadas en Vilagarcía trasladaron á nacionalista a súa preocupación polos incendios especialmente “virulentos” entre Vilagarcía e Caldas provocados polo vento e por pistas forestais en condicións inadecuadas así como a proliferación de “verquidos e vertedoiros incontrolados” dos polígonos industrias polo que demandan “máis implicación e axudas da Xunta” para limpar as verteduras.
Sobre as débedas, afirmaron que quedan montes veciñais conveniados coa administración forestal e obrigadas a pagar débedas “falsas e inxustas”. De non facelo, explicaron, deben entregar a xestión do monte a unha empresa forestal privada. Este problema, afirmaron, quedaría resolto se as comunidades entraran a formar parte dunha SOFOR polo que as débedas serían eliminadas.
Por último, tamén foi abordado o problema dos traballos subvencionados, que na actualidade, non poden ser realizados por medios propios, circunstancia que incide negativamente na xestión comunitaria e o fomento do emprego local.
Ana Pontón comprometeuse a trasladar ao Parlamento galego todas as demandas dos propietarios e propietarias dos montes veciñais do Salnés.
O BNG PRESENTA AS “BASES DEMOCRÁTICAS PARA UNHA NOVA GALIZA
Tralo encontro cos propietarios de montes, a portavoz do BNG participou no acto público celebrado no Auditorio Municipal de Vilagarcía de Arousa para presentar o documento das Bases Democráticas, proposta política do BNG ante o debate do cambio do marco institucional.
A portavoz do BNG manifestou que Galiza, “non pode quedar atrás” nun escenario que vai decidir un novo marco institucional, “temos que estar aí e cun novo status para a nación galega”, para acadar outro sistema financeiro, unha capacidade fiscal xusta, un concerto económico que produza beneficios no noso país, xestionar as infraestruturas como AP-9 e os aeroportos, así como poder decidir por nós sobre o sector enerxético ou a política forestal. “Ter e exercer o autogoberno implicaría ter as ferramentas para mellorar as condicións de vida de todos e todas as galegas e ter esas ferramentas, empodera a Galiza”, recalcou.
O actual Estatuto e a Constitución, explicou non permitiron que Galiza puidera desenvolver todo o seu potencial. Hai problemas estruturais que seguen presentes e mesmo agudizados nos anos de crise, realidade á que sumou á “recentralización política” do Partido popular e partido socialista, “unha receita letal para o noso país, para a nosa economía, a nosa lingua e a nosa cultura”.
Pontón insistiu na necesidade de dar un “xiro ao poder político galego” porque de non ser así, advertiu, veremos como Galiza sae “moi mal parada” do novo escenario político que se está a abrir. “Feijóo conduce a Galiza á irrelevancia política” e mantén unha actitude “submisa” ante Madrid e Rajoy. Precisamos contar con poder político para que Galiza non sexa “unha mera espectadora” ante os retos e cambios da política do Estado, concluíu.
