Ana Pontón insta á Xunta a intervir as residencias privadas de maiores e un plan de contratación "digna" na sanidade

Ana Pontón
Ana Pontón

Pontón insta á Xunta a exercer as súas competencias e iniciar un plan de choque “específico” para as residencias de maiores con probas masivas e material  de protección para persoal e usuari@s

“Non vale dicir que a situación das residencias galegas non é tan mala coma noutros territorios” é  necesario intervir as residencias publicas e  privadas e os  servizos de Atención ao fogar 

Afirma que a  situación de Celanova prendeu todas as alarmas e pide á  Xunta que actúe  sen dilación para que as residencias non sexan un foco de extensión do virus

A portavoz nacional do BNG, e candidata á presidencia da Xunta de Galiza Ana Pontón, insta á Xunta a exercer as súas competencias e iniciar un plan de choque “específico” para protexer ás residencias públicas e privadas  de maiores con probas masivas e material de protección para o persoal e persoas usuarias.

Para a portavoz nacional do BNG, a situación detectada en Celanova pon de relevo unha realidade en Galiza  moi diferente ao resto do estado e “non vale dicir” que a situación nas residencias galega “non é tan mala como a doutros territorios”, ese, para Pontón,  “non é un argumento nin xustifica o que está sucedendo”. O BNG, xa advertiu, “da especificidade dunha poboación moi envellecida en Galiza” polo que urxía un plan de choque con probas masivas e reparto de material de protección para os traballadores e traballadoras das residencias. Non se pode tardar tanto en reaccionar nin  tampouco se xustifica o “traslado  de responsabilidades entre a Xunta e o goberno do Estado” polo que volve a reclamar do goberno galego o exercicio das súas competencias para actuar con urxencia. Requirimos da Xunta  que tome en serio o que está acontecendo nas residencias de maiores e non abandone a un colectivo dos máis vulnerables ao coronavirus. “Xunta e goberno central deben coordinarse” e a Xunta debe “intervir as residencias privadas” para evitar que residencias públicas e privadas  sexan un foco de extensión do coronavirus.

Máis protección sanitaria para que o sistema non colapse

A portavoz nacionalista mantivo hoxe dous encontros  con representantes dos servizos sanitarios e socias por videoconferencia aos que trasladou o  agradecemento polo importante labor que están a facer para “coidar da nosa saúde e das persoas maiores”.

Este traballo, afirma resulta fundamental contra  unha crise “sen precedentes como a do coronavirus” e mostrou, outra vez o  seu  “orgullo” por  contar con profesionais con tanta humanidade e calidade en Galiza.

Plan de contratación “digna” para a sanidade pública

Tras  analizar  diversos aspectos da crise cos representantes sanitarios e de Servizos sociais,  Pontón asegurou que é necesario que a Xunta “multiplique os seus esforzos” e insistiu en que resulta  clave garantir de EPIs a todo o servizo sanitario  para que o sistema “non colpase”. O BNG propón máis compras directas e que o  tecido produtivo galego, que  non realiza labores imprescindibles, intensifique a produción  de material de protección sanitaria.

Por outra parte, Pontón recalcou que é preciso “contratar máis persoal na sanidade pública” en “condicións dignas” e non con contratos por horas ou días. Desgraciadamente, dixo, a emerxencia sanitaria irá a máis e  “non podemos precarizar ás persoas que nos están coidando.  Nesta liña puntou que é necesario poñer en marcha “un Plan de contratación garantindo a calidade das condicións laborais”.

 

Afíliate, faite do bloque
Anímate a dar o paso, súmate ao proxecto do BNG