Imprimir

Ana Pontón chama a encher as rúas o 25 de xullo para demostrar que “outra Galiza é posible” da man do BNG

BNG - Bloque Nacionalista Galego | 20 de xullo de 2019

Homenaxe Menfis
Homenaxe Menfis

O proceso de investidura, cunha Galiza desaparecida, “é o mellor retrato de que as solucións aos problemas do país non van vir desde Madrid”, advirte

Participou en Lalín na homenaxe a Xesús Cordeiro, Menfis, histórico militante nacionalista

A portavoz nacional, Ana Pontón, convidou a converter a celebración do Día da Patria nunha gran mobilización na rúa como demostración de que hai unha maioría social que quere cambio e quere construír “esa outra Galiza posible”, na que vivir e na que ter un traballo digno sen ter que coller as maletas.

“Hai outra Galiza posible que non quere ver como a xente nova emigra, que quere sanidade pública, que quere pensións dignas, é esa é a que podemos construír desde o nacionalismo”, declarou  Pontón, “por iso este 25X saíamos á rúa para reivindicar esa outra Galiza e empezar a construír con forza a alternativa que a pode facer posible: o BNG”.

Neste sentido, a líder nacionalista recalcou que as solucións para este país “non van vir desde Madrid” e puxo como exemplo estas semanas de intenso debate de investidura no que Galiza “estivo desaparecida”. “Nin unha soa forza política estatal, nin unha soa deputada ou deputado lle propuxo a Pedro Sánchez que o seu apoio a súa investidura se vinculaba a compromisos para solucionar problemas urxentes dos e das galegas. É o mellor retrato de como, ou está o Bloque, ou ninguén pon por diante os intereses de Galiza”, proclamou.

Homenaxe MenfisPor iso, insistiu, o Día da Patria é unha xornada de celebración, de reivindicación e manifestar orgullo “de ser quen somos, de ter lingua propia, de formar parte dun pobo solidario e traballador, saiamos á rúa a defender co que hai outra Galiza posible: a que está emerxendo con forza da man do BNG”, animou Pontón.

A líder nacionalista fixo este chamamento antes de participar no acto de homenaxe a Xesús Cordeiro, “Menfis”, histórico e destacado militante nacionalista que fora portavoz municipal no Concello de Lalín entre outras responsabilidades políticas. Actuacións musicais e a simbólica plantación dunha árbore xunta cunha placa de recoñecemento formaron parte dun acto aberto que contou coa intervención da súa filla, do actual concelleiro Francisco Vilariño, e coa presenza de familiares, amigos e militantes.

Pontón salientou “a súa entrega e compromiso, porque foi unha desas persoas que sempre tivo a Galiza na cabeza e no corazón e é un orgullo ter persoas así na nosa organización”. A dirixente do Bloque puxe en valor o “traballo político desde a humildade pero desde a firmeza” desenvolvido por Menfis ao longo da súa vida “para conseguir un futuro mellor para este país e para a súa xente”.

Podes ver este artigo na próxima dirección /articulo/novas/ana-ponton-chama-encher-ruas-25-xullo-demostrar-outra-galiza-posible-da-man-do-bng/20190720140525025184.html


© 2019 BNG - Bloque Nacionalista Galego

Bloque Nacionalista Galego
Avda. Rodríguez de Viguri, 16 baixo
15703 Santiago de Compostela
GALIZA
Correo: [email protected]
Teléfono: 981555850

facebook twitter youtube whatsapp telegram instagram flickr