Prado propón á Xunta comprar POVISA e incorporar este hospital á sanidade pública

Padro, Carreira e González co comité de Povisa
Padro, Carreira e González co comité de Povisa

O BNG mantivo un encontro co comité de empresa de POVISA tras coñecerse a intención da multinacional Centene, actual propietaria do hospital, de vender o centro a outra multinacional, Vivalto Santé; venda que se produce dentro dunha operación na que tamén se inclúen os hospitais Polusa en Lugo e Juan Cardona en Ferrol.

“Esta información está xerando enorme preocupación pola constatación de que a prestación sanitaria á 130.000 persoas da Área Sanitaria de Vigo e 1.400 postos de traballo están convertidos en mercancía, negocio para multinacionais, toda vez que esta venda pretende realizarse apenas tres anos despois de que fora adquirida pola multinacional estadounidense a prezo de ganga, tras ser rescatado por 24 M€ e capitalizado con cartos públicos”, explica a portavoz parlamentaria de sanidade, Montse Prado.

Prado traslada a total oposición do BNG a esta operación que, ademais, “compromete o dereito á saúde”, e demanda do Goberno do PP que poña fin “á anomalía de ter a case a metade da poboación da área de Vigo recibindo asistencia sanitaria nun hospital privado”. En lugar de permitir a venda especulativa de POVISA, reclama, “póñanse a traballar para mercar este centro e integralo na rede sanitaria pública e poñer en marcha toda as actuacións necesarias para que a totalidade da poboación da área sanitaria de Vigo reciba atención na sanidade pública”, alega.

O BNG destaca que o concerto da Xunta con Povisa é o máis caro xa non da sanidade pública de Galiza, senón de todo o Estado español, polo cal realiza a prestación dos servizos de asistencia hospitalaria a 135.000 persoas dos centros de saúde dos concellos de Cangas, Moaña, Baiona, Nigrán, Gondomar e aqueloutros que a administración determine do concello de Vigo, no que traballan 1.400 profesionais.

“Estamos diante dun tema de enorme relevancia, supón un paso máis na estratexia  do PP de poñer a sanidade publica en mans do capital transnacional, o 70% da sanidade privada que existente en Galiza está en mans de empresas foráneas que só buscan o negocio, e estalles posibilitando que cada vez teñan máis capacidade de presión e de condicionar a sanidade pública”, advirte.

“O valor fundamental deste hospital é o concerto que o Sergas mantén co mesmo,  84 millóns de euros máis IVE, ao que se engade o que a Xunta abona por outro servizos sanitarios como maxilofacial, queimados ou os cinco millóns de euros que recibe do SERGAS para que rebaixe as listas de agarda da sanidade pública”.

En total, explica Prado, “o 80% da súa facturación anual de máis de cen millóns de euros son con cargo aos impostos que pagamos os galegos e as galegas”, denuncia, en definitiva Ribera-Povisa é o maior hospital privado de Galiza, “pero que vive de recursos público”.

O goberno do PP, lonxe de actuar para garantir a calidade asistencial ou os dereitos laborais do cadro de persoal, ten ido na dirección contraria, “traballando para capitalizar este hospital privado para facilitar a súa venda é o negocio privado, o PP desde a Xunta actúa como unha máquina para xerar beneficio ás empresas de fora, ao capital especulativo e o que lle demandamos e que deixe de actuar como comercial destas multinacionais.

Todas as decisións tomadas pola Xunta de Galiza  foron na dirección de condicionar a área Sanitaria de Vigo reducindo as camas, servizos e prestacións do hospital Álvaro Cunqueiro e tendo infrautilizadas outras infraestruturas como o hospital Meixoeiro, para seguir mantendo un concerto multimillonario con Povisa, conclúa portavoz de sanidade, tras un encontro co comité de POVISA no que tamén participaron a portavoz de sanidade hospitalaria, Iria Carreira, e a deputada por Vigo, Carmela González.

 

 

 

 

Afíliate, faite do bloque
Anímate a dar o paso, súmate ao proxecto do BNG