Galegas 2016

Olalla Rodil: “Privatizar e destruír servizos foi a política do PP en sanidade e servizos sociais”

Encontro coa Xunta de Persoal do Hospital da Costa, Burela.
Encontro coa Xunta de Persoal do Hospital da Costa, Burela.
  • A candidata do BNG reuniuse en Burela coa Xunta de Persoal do Hospital da Costa, “un Hospital do que Feijoo anunciou a súa ampliación no ano 2009” lembrou Rodil
  • Olalla Rodil afirmou que “non merece ningún premio quen destrúe e privatiza e non apoia servizos tan básicos para a poboación como a sanidade e os servizos sociais”

Olalla Rodil, cabeza do lista do BNG por Lugo ao Parlamento Galego, visitou a Mariña onde mantivo encontros con divesos colectivos para coñecer, de primeira man, as demandas e propostas existentes na comarca. Rodil estivo acompañada de Montse Porteiro, número 3 da candidatura do BNG. A candidata do BNG reuniuse coa Xunta de persoal do Hospital da Costa, coa Plataforma pola Residencia da Terceira Idade de Ribadeo e con representantes de entidades deportivas da Mariña. “O que sucede coa sanidade pública na Mariña é paradigmático na política de desmantelamento, privatización e centralización provincial do sistema sanitario público galego polo que é fundamental apartar ao Partido Popular do goberno galego” sinalaron as candidatas do BNG.

Rodil afirmou que “é preciso rematar co estragulamento orzamentario da sanidade pública, favorecer a atención sanitaria de proximidade, e para recuperar a xestión sanitaria comarcal hai que apartar ao PP do goberno galego”. Para a canidata nacionalista  “privatizar e destruír servizos foi a política do PP en sanidade e servizos sociais” e avanzou que “Galiza precisa dun tempo novo, cunha nova perspectiva democrática, para apartar a un partido inzado de corruptos das institucións”. Rodil afeoulle a Núñez Feijoo o feito de non participar nos debates dos medios de comunicación e afirmou que “un presidente que se agocha dos debates sen render contas da súa xestión, vulnera o dereito das galegas e galegos de coñecer datos da súa xestión”.

As candidatas número un e tres do BNG –NÓS candidatura galega pola circunscrición de Lugo reuníronse a última hora da mañá coa Xunta de Persoal do Hospital da Costa en Burela. Olalla Rodil afirmou que “a formación nacionalista revisará todo o modelo sanitario do PP paralizando as privatizacións, comarcalizando a xestión sanitaria, impulsando o sistema de atención primaria, e dotando orzamentariamente o sistema de mais recursos e persoal para atender as necesidades da poboación”. As candidatas do BNG – NÓS tamén se reuniron coa Plataforma pola Residencia da Terceira Idade de Ribadeo, onde se mostra un exemplo claro do caciquismo e sectarismo do PP coa negativa a apoiar a un concello posta en servizo dun servizo social necesario e xustificado polo simple feito de non contar cun goberno municipal da súa cor política.

As candidatas nacionalistas explicaron algúns puntos do programa da formación, mostrando a intención do BNG –NÓS garantir a transparencia do sistema no caso das listas de agarda, acabar cos copagos sanitarios, eliminar o peche de camas en determinadas épocas do ano, aprobar un plan integral de saúde da muller ou  un código de prevención do suicidio. “É evidente que o Hospital da Costa deber ser ampliado, pero ampliando os servizos sanitarios, non o aparcamento que acabarán privatizando. Non é de recibo que se nos fale de ampliación cando nin sequera está prevista un equipo de resonancia magnética fixa e seguirase facendo cunha móbil cando cadra”, afirmou Montse Porteiro.

Residencia da terceira idade en Ribadeo

Pola tarde as candidatas nacionalistas reuníronse con integrantes da Plataforma pola Residencia da terceira idade de Ribadeo que levan traballando fai anos pola posta en marcha dunha nova instalación pola saturación da existente. O caso de Ribadeo con esta demanda social e a negativa da Xunta a colaborar na súa construción na que o concello so contou coa axuda económica do BNG no goberno da Deputación, é mostra do sectarismo e a política caciquil do PP, que financia ao 100% residencias que non se abren como a de Cervo, e nega toda colaboración en concellos onde non goberna como o caso de Ribadeo.

Afíliate, faite do bloque
Anímate a dar o paso, súmate ao proxecto do BNG