Olalla Rodil: "O PP usa a CRTVG como o seu gabinete de propaganda para maior gloria de Feixoo"

Olalla Rodil
Olalla Rodil

Rodil traslada o apoio aos profesionais que suman 100 venres negros reivindicando uns medios públicos libres de inxerencia política baixo o lema DefendaAGalega

“É indecente que nun momento excepcional se use a TVG como elemento de propaganda a maior gloria de Feixóo mentres se silencia á Cámara”, denuncia

Olalla Rodil: "O PP usa a CRTVG como o seu gabinete de propaganda para maior gloria de Feixoo"

O BNG súmase á celebración dos cen venres negros para denunciar o control e manipulación do PP dos medios públicos para convertelos na súa particular canle de propaganda, e reclamar unha CRTVG ao servizo da sociedade galega, como reivindican desde hai un cento de semanas os e as profesionais de Defende a Galega, na que é a maior mobilización na historia do ente público.

“A CRTVG débese a todas as galegas e galegos que a financian con máis de 100 millóns de euros anuais, pero o PP converteu os medios públicos na súa terminal de propaganda a base de control político e de manipulación como veñen denunciando semana a semana, desde hai cen, as traballadoras e traballadores de Defende a Galega. Control político da man do seu director xeral, Alfonso Sánchez Izquierdo, posto a dedo en 2009 por Feixóo e perpetuado no cargo pola porta de atrás en contra do disposto na Lei de medios públicos de Galiza”, denunciou a viceportavoz parlamentaria, Olalla Rodil.

Un control político por parte dunha dirección que, ademais, “nega dereitos laborais impedindo de maneira obscena desde hai anos o Estatuto profesional e a creación do Consello de informativos previstos na lei”, control político que exercen “con man de ferro contra os e as profesionais que se amosaron críticas, abrindo expedientes disciplinarios e mesmo con sancións”, denuncia a deputada.

A utilización partidista dos medios públicos por parte do PP é aínda maior na situación de crise derivada da pandemia, cunha TVG convertida como nunca en Telefeixóo. “É indecente que nun contexto excepcional os medios de comunicación públicos silencien sesións parlamentarias pero dediquen horas a retransmitir as roldas de prensa presidencias, -nun mes 16 veces, 800 minutos de pantalla-, propaganda televisada para culto dun líder que se nega a comparecer no Parlamento onde reside a soberanía popular”, critica Rodil.

O BNG volve trasladar o seu recoñecemento ás traballadoras e traballadores dos medios públicos, que levan cen semanas defendendo o dereito da cidadanía galega a contar cunha radio e televisión públicas que cumpran a función para a que foron creadas.

Isto é, “facilitar unha información próxima, plural, veraz e obxectiva, un dereito fundamental que debe ser garantido en calquera circunstancia pero máis en momentos de excepcionalidade como os que estamos a vivir. A crise do coronavirus traerá moitas mudanzas, -alega Rodil-, e cando pase haberá que reflexionar tamén sobre o papel dos medios públicos, porque a saúde dunha sociedade tamén se mide en termos democráticos e a nosa, neste momento, é de baixa calidade, co Parlamento amordazado e cuns medios públicos convertidos en terminal de propaganda do PP”.

A formación nacionalista aposta por impulsar cambios que permitan des-politizar a radio e a televisión públicas, empezando pola Dirección Xeral; garantir os dereitos profesionais e laborais do seu cadro de persoal e, en definitiva, aposta por poñer os medios públicos ao servizo da sociedade galega.

 

Olalla Rodil: "O PP usa a CRTVG como o seu gabinete de propaganda para maior gloria de Feixoo"