O deputado do BNG, Néstor Rego, defendeu durante o pleno do Congreso a gratuidade das autovías polos efectos negativos que tería para as clases populares e para os custos das actividades económicas na Galiza, que perderían competitividade. Rego considera inaceptábel que, cando o Goberno do Estado aínda non cumpriu o compromiso de baixar as portaxes da AP-9, anuncie que pretende implantalas nas autovías.
A posibilidade de implantar peaxes en todas as autovías está a xerar unha gran inquietude na Galiza polos efectos negativos que terían para as clases populares e para os custos das actividades económicas, especialmente nun País como a Galiza que ten unha localización xeográfica periférica na Península e en Europa.
“Unha medida que o Goberno pretende vender como ‘verde’, para ‘desincentivar’ o uso do vehículo privado, representará realmente unha lousa nun País como Galiza que non posúe transportes públicos adecuados nin unha rede ferroviaria á altura das necesidades do século XXI, especialmente para o transporte de mercadorías” enfatiza o deputado nacionalista en sede plenaria. Así mesmo, Rego quixo deixar claro que “sen alternativas, non é unha medida ecolóxica, é simplemente antisocial e antigalega”.
As peaxes, segundo sinala o deputado da fronte nacionalista, van gravar as clases populares e implicar un sobrecusto para as empresas galegas que continuarían perdendo competitividade. Ademais, “terían o efecto de aumentar o tránsito nas vías convencionais, xa en moitos casos colapsadas e onde se producen a maioría dos accidentes con resultado de morte. Na Galiza especialmente onde é difícil atopar un quilómetro de estrada sen casas ao redor”.
“Resulta sorprendente que este Goberno, que se auto-cualifica como 'progresista' non teña nunca en conta os custos sociais que decisións como esta poden implicar. Reducir o número de accidentes e de falecementos por violencia viaria debe ser un obxectivo prioritario” subliña Néstor Rego. As portaxes nas autovías terían, sen dúbida para a organización nacionalista, o efecto contrario: “maior custo en vidas humanas e tamén maior custo en gasto sanitario e social”.
Alén do máis, considera “inaceptábel” que, cando o Goberno estatal aínda non cumpriu o compromiso de baixar as portaxes da AP-9 para acabar co “roubo legalizado” a todos os galegos e galegas, “anuncie que pretende implantalas nas autovías. Primeiro cumpran, desenvolvan alternativas e despois falamos”.
Por outra banda, Rego apunta que “a postura do Partido Popular é hipócrita e demagóxica”, porque cando gobernaban formularon estas mesmas medidas nas autovías. “En todo caso, reafirmamos a oposición do BNG a elas porque, polo menos na Galiza, sen alternativas, non é verde, é simplemente un roubo” conclúe o deputado da organización nacionalista.
