PARLAMENTO GALEGO

Montse Prado leva ao Parlamento a saturación do servizo de urxencias no Hospital da Coruña denunciado polo persoal

Montse Prado
Montse Prado

“Pregúntolle señor conselleiro de Sanidade se é capaz de imaxinarse atendido no corredor dun hospital sen ningunha intimidade”, interpela

Pide á Xunta que actúe sobre as listas de espera, que solucione as carencias de persoal e que aporte máis recursos á atención primaria

Montse Prado leva ao Parlamento a saturación do servizo de urxencias no Hospital da Coruña denunciado polo persoal

A portavoz parlamentaria de sanidade, Montse Prado, trasladou ao Parlamento a situación de saturación do servizo de urxencias do hospital da Coruña denunciado polo comité de centros, pese a que aínda non se produciu o pico da gripe. Doentes que se acumulan nos corredores onde son atendidos sen contar cos medios suficientes e sen a máis mínima intimidade.

“É intolerable e unha falta de respecto coa persoa doente cambiar cueiros, poñer cuñas ou tomar constantes vitais e dispensar medicamentos no medio dun corredor e pregúntolle señor Almuíña se é capaz de imaxinarse a vostede nesa situación, se é capaz de imaxinarse ingresado por urxencias e que atendan no medio dun corredor sen ningún tipo de intimidade nin confidencialidade, é unha pregunta que debería facerse a si mesmo”, interpelou Prado ao conselleiro de Sanidade no debate en pleno.

Os profesionais denuncian que son unhas condicións “deplorables”, recalcou, tanto para as persoas doentes como para o propio persoal, condicións que non permiten dar unha atención axeitada. Mentres esta situación se da no CHUAC, -e noutros centros hospitalarios do país, o SERGAS mantén camas e mesmo plantas pechadas. “No Hospital da Coruña saltaron as alarmas porque a Xerencia quixo utilizar máis corredores, mesmo con correntes de aire, para seguir atendendo a persoas que acudían por urxencias e senón se fixo foi polo plante do persoal a atender en semellantes condicións”, alegou.

“Está é a situación antes do pico de gripe imaxinemos o que pode pasar cando se produza”, recalcou a deputada, tras insistir en denunciar os servizos pechados, como por exemplo unha planta de maternidade “aínda en escombros”.  “Cando dicimos que esperan horas referímonos a persoas que están horas en padiolas, incluídas persoas maiores”, denunciou.

Esta situación de saturación non é exclusiva do hospital da Coruña senón que tamén se da no Hospital Alvaro Cunqueiro, no Montecelo ou no Hospital de Lugo, indicou a modo de exemplo de que a saturación das urxencias hospitalarias tense convertido nun problema estrutural na sanidade pública.

Prado criticou a “apertura acordeón”,  de tal xeito que se abren camas “pero cando se ve que baixa un pouco a afluencia de doentes volven pechalas, cando deberían ter todos os efectivos operativos de xeito permanente porque abrir unha cama non é como darlle a un interruptor, require toda unha serie traballos de posta en funcionamento que implica a moitos profesionais”.

Plans de contixencia contra a saturación

A nacionalista indicou que, no CHUAC, os corredores de urxencias son zonas de paso “pero vostedes as están utilizando como se foxen zonas de atención permanente durante horas e mesmo días enteiros, pero non teñen baños, non teñen duchas, non teñen a infraestrutura necesaria para dar comidas, nin para cambiar cueiros ou poñer cuñas pero aínda así o fan de xeito continuado”.

Para acabar con esta situación de saturación dos servizos de urxencia, a deputada reclamou á Consellería de Sanidade que poña en marcha un plan real de estabilidade do emprego, unha intervención eficaz para reducir as listas de espera e máis fondos para a atención primaria como porta de entrada ao sistema, “porque de non ser así as persoas seguirán acudindo ao servizo de urxencias buscando atención sanitaria”.

A deputada nacionalista tamén reclamou a Almuíña os plans de continxencia para evitar a saturación das urxencias en períodos concretos nos que se prevé moita afluencia, “din que existen eses plan pero os profesionais aseguran que non os coñecen”, concluíu.

 

 

Montse Prado leva ao Parlamento a saturación do servizo de urxencias no Hospital da Coruña denunciado polo persoal