Mini: “A redución dos orzamentos para reparación de camiños, nova mostra do pasotismo da Xunta co rural”

Xosé Luís Rivas "Mini"
Xosé Luís Rivas "Mini"

O goberno do PP reduce nun 60% a partida para a mellora de camiños rurais

O portavoz parlamentario de Agricultura, Xosé Luís Rivas, denunciou no Parlamento o recorte na partida destinada a reparación de camiños rurais, o que interpreta como nova mostra do abandono do medio rural por parte da Xunta.

“O Plan marco de mellora de camiños rurais para 2016, que contaba cunha dotación de 20 millóns de euros, reduce os fondos dispoñíbeis en máis dun 60%, e por citar un exemplo concreto, o concello de Boimorto, no que eu resido, tivo o pasado ano unha asignación 72.457 euros e pasa neste exercicio a ter 29.388”, explicou o deputado pola Coruña.

Rivas argumentou na súa interpelación á conselleira de Medio Rural que este recorte “deixa as claras que os investimentos para desenvolver e mellorar a vida no rural non son un prioridade do Goberno do PP, xa que recorta partidas que inciden directamente na mellora de equipamentos e infraestruturas necesarias para potenciar a produtividade do agro galego”.

Para o Bloque, con esta diminución de fondos vitais para os concellos do rural, “o PP rexeita manter o esforzo de fondos públicos que permite mellorar a calidade de vida das persoas que viven no rural e que, ademais, contribúen a corrixir os desequilibrios territoriais e a fixar poboación no interior do país”.

O deputado nacionalista aproveitou este debate para reivindicar un mellor financiamento dos concellos galegos, “tema pendente porque o actual sistema condena aos alcaldes e ás equipas de goberno a mendigar en institucións superiores”, concluíu, tras instar á conselleira de Medio Rural a seguir o slogan do propio Feijóo “e demostrar que militan no rural”.

Afíliate, faite do bloque
Anímate a dar o paso, súmate ao proxecto do BNG