O deputado do BNG, Luís Bará rexistra diversas iniciativas nas que pregunta ao Goberno polas medias para evitar “o caos das novas concesións do transporte público adxudicadas pola Xunta” e que entraron en vigor a comezos do mes de agosto provocando reclamacións de persoas usuarias e concellos.
O parlamentario nacionalista asegura que as reclamacións producíronse en todas as zonas dos novos contratos e ademais de facer constar o empeoramento do servizo polo cambio ou supresión de liñas, servizos e horarios, alertan sobre “as consecuencias que se poden producir co comezo do curso escolar no mes de setembro”.
Por outra parte, engade Bará, a Xunta de Galiza comunicoulle ás concesionarias a posibilidade de facer cambios no servizo, chegándose a recuperar, nalgúns casos, as liñas e horarios antigos, o que suporía unha modificación das condicións dos novos contratos. Esta situación pon en evidencia o que xa denunciou o grupo parlamentar do BNG desde o inicio do procedemento, un proceso caracterizado “polas presas, falta de información e participación, ademais de escurantismo”.
Ademais de preguntar ao goberno polas medidas para evitar o caos derivado das novas concesións do transporte públicos, o parlamentario do BNG presenta unha interpelación para coñecer como valora a Xunta a implantación das novas concesións e se considera adecuado destinar máis de 800.000 euros a uns estudos que conteñen numerosos erros e que deron lugar a un gran desbaraxuste polos cambios introducidos en materia de rotas, horarios e servizos. Ten previsto a administración penalizar ás empresas polo deficiente traballo? . Cantos concellos solicitaron cambios nas novas concesións para adaptar as rotas, servizos e horarios ás necesidades da poboación ou se a Xunta autorizou ás empresas adxudicatarias a realizar cambios nas novas concesións aos poucos días de entrar en vigor para calmar as protestas das persoas usuarias, serán parte das cuestións que o deputado do BNG trasladará ao goberno.