Luís Bará: "Os Orzamentos de 2018 non responden ás prioridades das galegas e dos galegos"

Comisión Luís Bará
Comisión Luís Bará

Criticou “a pleitesía” do goberno galego ao goberno de Madrid,   descoordinación na xestión da vaga de lumes e baixa  de execución das inversións proxectadas

O deputado do BNG, Luís Bará criticou hoxe as contas presentadas polo vicepresidente Alfonso Rueda para o ano 2018 afirmando,  “son uns orzamentos que non responden ás prioridades de Galiza”.

Para o deputado,  os  orzamentos “continuistas” da consellería da Presidencia, Administracións Públicas e Interior  responden máis a unha “subdelegación do goberno de Madrid ou  xestoría”  que a unha administración que aposte polas prioridades do noso país. Vostedes funcionan  como unha administración “con piloto automático”, sen dirección e rumbo claro,  son “un goberno prescindible”.

Bará afirmou que a administración “é moi pouco eficiente” como demostran os datos de execución do primeiro trimestre. A consellería de Medio Ambiente co 32,92%, Economía e Industria,  que debería ser un departamento central, ascende ao  23.89% e Medio Rural o 34,37%, con “todo o que está caendo”. Vostede, dixo dirixindose a Rueda,  non pode  poñerse de perfil porque é responsable da coordinación e impulso do goberno e criticou  que o vicepresidente galego gaste  máis   enerxías como  xefe provincial do PP de Pontevedra cociñando “mocións de censura” e dirixindo  a oposición na Deputación e no concello de Vigo que impulsando políticas para mellor a calidade de vida dos galegos e galegas.

Nestes orzamentos, manifestou Bará, “non hai estratexia nin prioridades para  respostar a grandes retos entre os que destacou: “o desequilibrio territorial, abandono do rural, o problema demográfico, políticas contra a emigración xuvenil e medidas para combater a desigualdade de Xénero”. Estas cuestións fundamentais  para o pobo galegos carecen de importancia para  Partido popular  pero son “uns fenómenos en practicar pleitesía ao goberno de Madrid”. Feijóo e o seu goberno funcionan  como unha delegación de Rajoy e as empresas do IBEX. “Non aprobaron o 155 pero toman as decisión  dende Madrid mentres vostedes obedecen de maneira servil” como comprobamos no caso da AP-9.

EMERXENCIAS E POLÍTICAS DE IGUALDADE

Para o deputado, a crise dos lumes “sacoulle as cores” ao sistema de emerxencias e  puxo en evidencia a “ausencia de medios e descoordinación”. Ante tanta improvisación, foi  cidadanía a que debeu facer fronte ao lume. Estamos nunha  situación complexa polo   abandono do monte e  cambio climático e a  resposta non pode ser  falar de “orde pública e ataques terroristas incendiarios”. “Estamos ante un problema político e iso non se resolve cun titular”, hai que combater o abandono do monte con outra política forestal e sobre todo incrementando os  medios.

O parlamentario criticou a baixa execución nas políticas de Igualdade, protección e promoción da muller cun  41%. As  de apoio para mulleres vítimas de violencia de Xénero alcanza o 53%, cantidades  das que é mellor, recalcou,  “non presumir nin botar foguetes”.

ORZAMENTOS INFRAESTRUTURAS E VIVENDA

Por outra parte, trala presentación  dos orzamentos da consellería de Infraestruturas e Vivenda, o deputado lembrou “as contas e contos” que están na memoria e que repiten  proxectos que logo non se   cumpren.

O deputado tamén criticou a baixa execución en  infraestruturas e rehabilitación, dous ámbitos de grande impacto laboral. Entre os proxectos non executados destacou as estacións intermodais, lembrando que xa no ano 2015 a Xunta comprometeuse ás obras da estación de Vigo  e no 2016 iniciar as de Ourense e Coruña. Estamos a finais  do 17 e a obras non comezaron pero agora anuncian que serán para o ano 2018 polo que pediu máis “axilidade”  tendo en conta que teñen unha data límite e contan con fondos europeos.

O goberno non  fai unha  forte aposta pola  mobilidade, o transporte e a vertebración do territorio, sobre todo do rural e do interior polo que reclamou medidas  que impulsen a mobilidade sustentable,  e sobre todo para o  ferrocarril.

O deputado tamén reclamou “modelos urbanos integradores” para xerar dinamismo social e comercial fronte ao modelo de dispersión e  desorde no urbanismo e na rede viaria.

Ao igual que fixera coa consellería de Presidencia, Bará reiterou que Infraestruturas e vivenda actua de maneira “submisa con Madrid”, e para mostra, “o veto vergoñento á transferencia  da AP-9”. Vostede, dixo, tampouco non nos falou hoxe dos “continuos colapsos” da autoestrada  como o de  hai uns días na ponte de Rande. Bará preguntou polas  medidas que tomará o goberno para resarcir a todas as persoas que durante dúas horas quedaron retidas.

Finalmente, o nacionalista mostrouse moi crítico co novo modelo de transporte escolar  e preguntou canto investirá a consellería para resolver os puntos negros da rede viaria  e  cando a lei  de  rehabilitación tralo anunciou do plan Rexurde no que Feijóo prometeu rehabilitar 10 mil vivendas nos cascos históricos do rural  durante esta lexislatura.

Asemade preguntou polo número de vivendas baleiras e as previsión sobre  o Observatorio da vivenda.  

Afíliate, faite do bloque
Anímate a dar o paso, súmate ao proxecto do BNG