Luís Bará desprega unha bandeira da Patria e o escudo deseñado por Castelao no Parlamento Galego

O deputado nacionalista quere denunciar con este xesto a retirada de bandeiras galegas en encontros deportivos

Pide ao secretario Xeral para o Deporte, Lete Lasa,  que se pronuncie sobre o acontecido e reprobe as requisas no estadio do Pasarón de Pontevedra

Luís Bará desprega unha bandeira da Patria e o escudo deseñado por Castelao no Parlamento Galego

A través dunha pregunta ao goberno, o parlamentario do BNG, Luís Bará denunciou as requisas de bandeiras galegas estreleiras e outros símbolos de identificación política, nos estadios galegos a pesar de non existir a prohibición para exhibir estes símbolos.

Minutos antes de comezar a pregunta do BNG, o parlamentario despregou na Comisión unha bandeira galega coa estrela e un escudo deseñado por Castelao, símbolos que tivo que retirar  por petición do presidente da mesa ao remate da súa intervención e comezo da resposta do goberno.

Bará  explicou que no estadio de Balaídos a afección do  Celta pode exhibir libremente bandeiras e outros símbolos de identidade, no caso do Pasarón, en Pontevedra existe “unha prohibición expresa por parte da dirección do clube”, que se traduce na requisa de bandeiras estreleiras, bandeiras republicanas, bandeiras co escudo de Castelao... e a advertencia de sancións ás persoas que exhiben estes símbolos. Neste sentido, nas últimas tempadas tramitáronse  dous expedientes sancionadores con multas de 300 e 500 euros, xunto coa prohibición de entrada ao estadio.

                                    Para o nacionalista, estamos ante unha actitude represora que na práctica supón un atentado contra a liberdade ideolóxica e a liberdade de expresión, dereitos fundamentais nun estado democrático. Pero sobre todo, manifestou, estamos diante dun “burdo intento de criminalización da exhibición de símbolos que son expresións lexítimas do pluralismo político”. Neste sentido, lembrou  que existen sentenzas xudiciais que conclúen que prohibir bandeiras estreladas nos estadios conculca a liberdade de expresión.

Tras a resposta do secretario Xeral para o  deporte, o deputado replicou que nos estadios galegos non se rexistran actos violentos relacionados coa exhibición de bandeiras galegas  e cominou ao responsable de deporte da Xunta a pronunciarse e  comunicar, a quen corresponda, que a exhibición destes símbolos “non está prohibida”. Nun momento da quenda de réplica, Bará mostrou o documento da Xunta que recolle un amplo abano de símbolos prohibidos por incitación á violencia, á xenofobia, ao racismo...mentres que os símbolos galegos, recalcou “nada teñen que ver” cos que estou amosando.

Non existe ningunha razón para prohibir as bandeiras ou o escudo deseñado por Castelao porque non o prohibe nin o manual da Xunta nin hai sentenzas   nesa liña, polo tanto todo indica que estamos ante unha pretensión para   “silenciar , reprimir, amordazar e prohibir unha serie de símbolos que se identifican cunha determinada ideoloxía lexítima, lícita e democrática e que non se debe perseguir”, concluíu.