- A parlamentaria do BNG, Olalla Rodil manifestou que, despois de cinco días aínda hai cinco casas en Guntín sen luz, unha ducia en Navia de Suarna e cortes de electricidade en vivendas de Lugo e A Estrada.
A parlamentaria do BNG, Olalla Rodil iniciou a súa intervención, no debate das emendas do BNG á Lei de medidas fiscais e administrativas, lamentando a negativa do PP a cambiar a orde do día para que o presidente da Xunta comparecera no pleno e dera explicacións sobre os cortes de subministro eléctrico rexistrados estes días en Galiza.
Olalla Rodil afirmou que o Goberno debería dar explicacións do que está a acontecer en Galiza a día de hoxe porque non é un problema do “cumprimento dos protocolos das eléctricas” durante o temporal. A nacionalista lembrou as palabras pronunciadas por unha veciña na Televisión pública galega denunciando que “ non se cumpre coa limpeza dos tendidos eléctricos e cando hai temporal, as árbores que tiñan que ser taladas caen enriba do tendido”.
A parlamentaria manifestou que, despois de cinco días aínda hai cinco casas en Guntín sen luz, unha ducia en Navia de Suarna e cortes de electricidade en vivendas de Lugo e a Estrada.Na súa opinión, resulta “vergoñento” que un país produtor de enerxía excedentaria teña a veciñanza “cinco días sen luz” e nalgúns casos con vivendas moi próximas aos encoros.
A comezo da sesión plenaria, a portavoz do grupo parlamentario do BNG, Ana Pontón pediu alterar a orde do día e introducir a comparecencia do Goberno para explicar as graves consecuencias provocadas polos sucesivos temporais, mesmo con perda de vidas, ademais de en propiedades privadas, servizos, equipamentos públicos e infraestruturas. Os votos en contra do Partido popular impediron que prosperara a reclamación do BNG.