O Consello Nacional aproba o orzamento de 2021 que reducirá a cero a débeda en 2022

Evolución Débeda BNG
Evolución Débeda BNG

Recoñece o inmenso mérito colectivo dunha militancia que foi quen, colectivamente, de enfrontar unha difícil situación económica nun contexto político moi complicado.

O Consello Nacional aproba o orzamento de 2021 que reducirá a cero a débeda en 2022

O Consello Nacional do BNG, na súa última reunión, aprobou o orzamento da organización para o ano 2021, e avaliou a evolución da débeda do BNG. En cumprimento das normas que nos temos dotado, pasamos a comunicar a toda a militancia esta información, e pendurarémola tamén no apartado de transparencia da nosa web nacional, facéndoa pública.

O cadro que se anexa axústase legalmente ao formato e á estrutura de fiscalización do Tribunal de Contas do Estado español. Con todo, e con independencia dese carácter técnico e contábel, consideramos preciso dar conta á militancia das seguintes consideracións de carácter máis político:

  1. Podemos dar por definitivamente superada a crise financeira que padeceu o BNG nos últimos anos. Conseguímolo porque somos unha grande organización, da que nos debemos sentir orgullosas e orgullosos.
  2. Boa parte da actividade política e social do BNG fundaméntase no traballo militante. Non só somos diferentes polos obxectivos que perseguimos, mais tamén por como desenvolvemos  e concibimos a nosa actuación no día a día, e o que supón en termos económicos e financeiros. Sen o compromiso militante, isto sería imposíbel.
  3. A evolución da débeda (da que continuamos a realizar un cumprimento estrito da súa amortización), sitúase neste 2021 nos 64.330 euros de endebedamento, prevéndose a súa eliminación definitiva no vindeiro ano 2022. Incluímos tamén un gráfico sobre a evolución do patrimonio neto do BNG.
  4. Como conclusión lóxica do exposto, cómpre recoñecer o inmenso mérito colectivo dunha militancia que foi quen, colectivamente, de enfrontar unha difícil situación económica -nun contexto político tamén delicado- con coraxe, determinación e moito esforzo. Fixémolo entre todas e todos, coas nosas mans, sen axuda de ninguén. Os resultados están á vista, e o Consello Nacional expresa o seu recoñecemento por unha organización, por unha militancia, que segue a ser o seu mellor valor.

PATRIMONIO NETO

O Consello Nacional aproba o orzamento de 2021 que reducirá a cero a débeda en 2022