Xerais 2019

Carme da Silva: “Agora é o momento! temos que frear á dereita e dar voz a Galiza da man do BNG”

A cabeza de lista pediu en Lalín concentrar no Bloque os votos “en clave de país” para que Galiza e o Deza estean na axenda das políticas estatais

“Agora é o momento! Temos que frear á dereita e dar voz a Galiza da man do BNG”. Esa foi a petición que a cabeza de lista por Pontevedra, Carme da Silva realizou hoxe en Lalín no mitin de peche de campaña na provincia asegurando que os votos ao Bloque terán un valor dobre o vindeiro domingo.

Da Silva amosouse convencida de que o BNG vai ser “o dique que impedirá a Vox e C’s entrar en Galiza”, polo que animou a “votar con orgullo, dignidade e rebeldía para que Galiza conte e ser o dique de contención da dereita rancia”. Así o manifestou facendo un chamamento aos indecisos, á xente moza e ás persoas decepcionadas polas últimas lexislaturas para non perder un só apoio e concentrar no BNG os votos en “clave de país”.

“Xogámonos ser ou non ser. Que Galiza estea desaparecida, ignorada e cada vez máis discriminada. Está ao alcance da nosa man que o BNG sexa quen lle pare os pés á dereita rancia e machista”, dixo, instando a non deixarse levar pola política do mal menor e preguntándose cal é realmente o voto máis útil para Galiza. “Que fixo o PP? Que fixeron PSOE-Podemos-En Marea nos últimos dez meses? Subiron as peaxes e propuxeron un recortazo de 750 millóns de euros en investimentos”, subliñou.

Da Silva destacou o traballo realizado polo BNG cando estivo no Congreso e asegurou que a xente botou en falta que existise unha axenda galega en Madrid. Agradeceu a forza recibida por parte da xente nos actos, na rúa e nas redes sociais durante a campaña, polo que se aventurou a afirmar que o Bloque vai rebentar as enquisas e ser a gran sorpresa o vindeiro domingo. Lembrou que todos os inquéritos sitúan ao Bloque como a forza política que pode gañar o escano en disputa pola provincia de Pontevedra, e insistiu na necesidade de sumar os apoios de todos os que lle queren a Galiza.

A candidata salientou tamén a importancia de que os temas que precisa Galiza e o Deza estean na axenda do Estado defendidas por unha voz propia e sen ataduras. Neste sentido criticou a Ana Pastor, quen “sen ruborizarse” dixo durante esta campaña e ao longo de todo o país que está indignada porque non se lle transfire a AP-9 ou a AP-53 a Galiza. “Cando menos é curioso que o diga, porque tívoo na súa man en Madrid como ministra de Fomento e como presidenta da mesa do Congreso. Nós estamos convencidos de que a AP-9 e a AP-53 deben ser galegas, públicas e sen peaxes e sempre o defendemos así”, subliñou.

Tamén ironizou sobre as declaracións de Núñez Feijóo, que durante a campaña pediu aos galegas e galegas diferenciasen entre políticas útiles e inútiles e forzas que se deban ou non ao que lle din dende Madrid. “Está pedindo o voto para o BNG e non se dá conta!”, dixo Da Silva, lembrando que Feijóo só obedece ordes de Casado, poñendo como exemplo o uso do superávit. “Debe pensar que el non é unha franquicia de Madrid porque o chaman de Génova e pensa que é en Italia”, bromeou.

A candidata falou tamén da visión da muller que teñen os tres partidos da dereita. Asegurou que “defenden que as mulleres sigamos atadas á pata dunha mesa” e fixo fincapé nas palabras de Ana Pastor, facendo seguidismo das palabras de Casado, ou de Cayetana Álvarez de Toledo, da que dixo “mellor non comentar nada”.

Afíliate, faite do bloque
Anímate a dar o paso, súmate ao proxecto do BNG