O deputado do BNG, Daniel Rodas salientou que as constas galegas rexistran a taxa máis alta de sinistralidade en Europa ante o denso tráfico marítimo de mercadorías
Pleno.- O parlamentario do BNG, Daniel Rodas defendeu hoxe unha Proposición de lei para reclamar o traspaso de competencias a Galiza en materia de Salvamento Marítimo e loita contra a Contaminación Mariña.
O deputado nacionalista iniciou a súa intervención enviando, no seu nome e do BNG, as súas condolencias ás familias e amig@s dos dous mariñeiros desaparecidos, José Pardiño e Benigno Vázquez, tras o afundimento do Safrán.
Para Rodas, os recentes sinistros no mar poñen de manifesto un modelo inadecuado vixente no Estado español para o salvamento marítimo en relación coas peculiaridades do litoral galego. Ao seu xuízo, é urxente organizar en Galiza un dispositivo propio, máis eficaz e profesional baixo control público galego.
O parlamentario denunciou os retrocesos nos sistemas operativos de seguridade e salvamento marítimo a través da privatización dos sistemas de radiocomunicación, os helicópteros de Salvamento Pesca I e Pesca II que deixan os labores de rescate en mans de empresas privadas e establece tarifas polas operacións de salvamento.
O deputado lembrou o gran número de accidentes derivados do tráfico marítimo que recorre a costa galega entre os que destacou: O Mar Exeo , Casón, Urquiola, Andros Patria, Erwick, Polycomander, ou a catástrofe do Prestige do que Rajoy dixo, son unos pequeños hilillos recalcou o nacionalista
Ademais da longa lista mencionada, o deputado tampouco esqueceu os graves sinistros na activade pesqueira que acabaron con moitas vidas de mariñeiros. Na última década, dixo O Mar noso, Mar de Marín, Santa Ana, Nuevo Ana, Rosamar, Nuevo Amorín, MF Díaz , Sempre Cansina, Punta Robaleira Uno, Tabar ou Nuevo Luz , son un claro exemplo.
O PP impide que prospere a iniciativa do BNG
Pola súa parte, a portavoz do Partido popular, Paula Prado anunciou o voto en contra á Proposición nacionalista por entender que resulta máis efectivo que as competencias en materia de salvamentos marítimo e loita contra a contaminacións sexan responsabilidade do Goberno central, como se demostrou no accidente do Prestige.
O deputado replicou que precisamente a nefasta xestión da catástrofe do Prestige e os sucesos deste ano, fan urxente a transferencia a Galiza.
A iniciativa do BNG contou co apoio de AGE e Grupo Mixto, a abstención do PSOE e voto en contra do Partido popular.