GALEGAS 2020

O BNG propón unha axenda urbana para conseguir vilas e cidades saudábeis e sustentables que planten cara á emerxencia climática

Axenda urbana
Axenda urbana

Rodil insta a unha gran mobilización o 12X a favor do cambio galego que tamén significa apostar por un modelo de concellos no que o centro sexan as persoas

Reducir as emisións de efecto invernadoiro, calmado de tráfico, xestión eficiente de residuos, compostaxe, entre as medidas incluídas na proposta ambiental do BNG

O BNG propón unha axenda urbana para conseguir vilas e cidades saudábeis e sustentables que planten cara á emerxencia climática

Coa bicicleta como símbolo dunha mobilidade sustentable capaz de reducir as emisións contaminantes, recuperar espazo público para as persoas e avanzar nun modelo de vilas e cidades sustentables, o BNG presentou en Lugo a súa proposta de axenda urbana 2020-2030 incluída no programa de goberno demostrando que desde Galiza tamén se pode combater a emerxencia climática, como xa se está facendo en concellos referentes nos que goberna a formación que lidera Ana Pontón, como a cidade de Pontevedra ou a vila de Carballo.

Olalla Rodil, cabeza de lista por Lugo, salientou que a proposta do BNG parte do obxectivo de “avanzar no deseño de vilas e cidades máis humanas, sustentables e capaces de enfrontar o desafío do cambio climático, que centren e deseñen as políticas pensadas para as persoas”, explicou, unha cuestión urxente que unha pandemia como a da COVID19 non fixo senón poñer aínda máis en primeiro plano a necesidade de apostar por concellos “saudábeis con espazos públicos de calidade”.

“Dentro desa aposta por concellos humanizados e sustentables, o BNG ten como medida do seu programa de goberno a implantación dunha axenda urbana 2020-2030 en consonancia cos obxectivos marcados pola ONU en termos de sustentabilidade e de loita contra a emerxencia climática”, explicou Rodil, “un modelo de axenda urbana deseñado desde Galiza para colocar ás vilas e cidades do noso país na vangarda da loita contra a crise climática, con concellos a medida das persoas e cunha mobilidade respectuosa co medio ambiente e tamén con patrimonio, como é no caso de Lugo a muralla romana bimilenaria”, sinalou.

A premisa é que o espazo público “é un dereito fundamental”, en particular pensando nos colectivos máis vulnerables. Nestes sentido, o Bloque avoga por garantir “un acceso universal para as persoas, en particular as que teñen unha mobilidade reducida, pero tamén para os nenos e as nenas”, indicou Rodil.

Entre as principais propostas que conforman a axenda urbana de preservación ambiental: minimizar a contaminación urbana de todo tipo, industrial, residencial e, especialmente a asociada ao tráfico rodado. Esta última estaría centrada en medidas de redución e calmado de tráfico, medidas para a recortar as emisións de gases de efecto invernadoiro e para lograr que os asentamentos humanos sexan cómodos, agradábeis e seguros, con especial énfase na actualmente moi deficitaria seguranza viaria. Igualmente, a axenda urbana que defende o BNG aposta potenciar a prevención, reutilización e reciclaxe de todo tipo de residuos xerados polas actividades produtivas e tamén os residuos urbanos que xera a poboación, neste caso por exemplo fomentando a compostaxe coa máxima proximidade posíbel ao lugar de xeración.

Tamén inclúe propostas para reducir o consumo de enerxía dos servizos urbanos: ciclo da agua con especial énfase na minimización de fugas, iluminación pública, e uso de enerxías renovables en edificios públicos.

“Este 12 de xullo temos a oportunidade de abrir un tempo novo en Galiza e desde o BNG estamos convencidas de que ese tempo consiste tamén en deseñar un modelo urbano alternativo pensado para que as persoas o desfruten, o gocen e transiten por el, un modelo para garantir unha mobilidade que reduza as emisións e contribúa a combater a crise climática”, concluíu Rodil.

 

O BNG propón unha axenda urbana para conseguir vilas e cidades saudábeis e sustentables que planten cara á emerxencia climática