Para a nacionalista, as 40 propostas do BNG “son reais e colocan a Galiza no século XXI fronte ás propostas da década dos 90 de Feixóo”. A xuízo da parlamentaria, “Feixóo representa o pasado” e no Debate do Estado da Nación celebrado onte no Parlamento galego constatou que “non ten ningunha proposta que ofrecer a Galiza” e mesmo tivo que “rescatar ideas da década dos 90 para traer algo ao debate”. Rodil afirmou que Galiza está no século XXI e “merece máis” polo que reiterou a vixencia das propostas do BNG como alternativa aos problemas reais do noso país.
A deputada criticou a falta de propostas de Feixóo sobre un novo modelo de financiamento, medidas para acabar coa precariedade laboralo ou para resolver a enorme crise industrial de Alcoa, Ferroatlántica, Isowat, As Pontes, Poligal, ou R . Onte, afirmou Rodil, Feixóo deixou claro que “manterse na Xunta de Galiza é un fin en sí mesmo, un salvavidas persoal e para o seu partido”.
Fronte a isto, as 40 propostas do BNG son a solución a problemas reais, aos problemas que viven as galegas e galegos e que o presidente da Xunta decidiu ignorar. Porque hai “unha Galiza real e logo a Arcadia feliz de Feixóo”, apostilou a deputada.
PROPOSTAS DO BNG
-Impulso económico e modernización para encarar a crise demográfica con impulso industrial e peche de ciclos produtivos. Poñer a enerxía ao servizo do desenvolvemento cun prezo xusto e competitivo para familias e tecido económico. Unha Tarifa Eléctrica Galega que reduza as peaxes por transportar fóra a enerxía e unha estratexia para pechar ciclos produtivos xerando valor engadido no sector agrogandeiro, forestal e no mar.
O BNG tamén propón “un Pacto pola Ciencia” para converter o I+D+i no motor de desenvolvemento económico dotado cun investimento progresivo do 3% do PIB en innovación. Crear o Instituto Galego público de innovación (INNOGAL) e deseñar un programa integral de I+D+i con perspectiva de xénero para impedir que as investigadoras se vexan obrigadas a abandonar a súa carreira investigadora “por ser nais”.
Outra das propostas é crear unha Banca Pública ao servizo das pequenas e medianas empresas galegas semellante ás que existen en Alemaña, Francia, Noruega, Dinamarca ou Países Baixos.
Benestar social e Igualdade
Blindar os servizos públicos: Sanidade e Educación. Reverter os recortes en Atención Primaria e as privatizacións; recuperar as xerencias e garantir o persoal necesario nos PACs e centros de saúde.
No ámbito educativo aprobar unha lei galega e suprimir os concertos co ensino privado.
Rodil tamén presentou medidas contra a violencia machista reclamando investir, como mínimo, o “1% do Orzamento” e crear Xulgados exclusivos de violencia nas cidades
Para as pensións non contributivas, o BNG propón un incremento de 100 euros. Por outra parte, tamén reclamar 198 M€ que adebeda o Estado a Galiza en materia de dependencia e medidas reais de conciliación coa escolarización de 0-3 anos e un “Banco de horas de Canguro” para situacións sobrevidas ou imprevistas.
Autogoberno: Medidas para gañar peso político como país
O BNG propón crear unha ponencia cara un “novo estatus político” e deseñar un novo modelo de financiamento así como defender unha Axenda galega ante o Estado.
Paralizar a prórroga de ENCE, pagamento do porto exterior da Coruña, reclamar ao Estado 2 mil M€ para modernización do ferrocarril e convocar Comisión mixta de transferencias son algunas das propostas que mañá defenderá o BNG no Debate do Estado da Nación ás que sumará as de proxección exterior de Galiza e un Plan de impulso de relacións económicas, políticas, lingüísticas, culturais cos países da CPLP forman parte das prospostas que mañá defenderá no Debate anual do Estado da Nación.
