A deputada do BNG por Ourense, Noa Presas levou hoxe ao Parlamento, a través dunha pregunta ao goberno, a situación “insostible” dos traballadores e traballadoras do servizo de mantemento do CHOU en folga dende hai 97 días contra as condicións laborais e vulneración dos dereitos impostos por Ferrovial.
Tras saudar aos representantes dos traballadores presentes na tribuna de convidados, Presas lembrou que o servizo de limpeza e mantemento resulta fundamental para o funcionamento do centro hospitalario porque “os dous servizos manteñen o resto do CHOU”. Ademais, lembrou que os traballadores e traballadoras levan xa 97 dias de folga, “97 días sen soldo e cunha angustia extrema” polo que pediu ao Goberno galego “implicarse” na resolución do conflito.
A nacionalista explicou que no ano 2014 foi adxudicada a xestión integrada de varios servizos non asistenciais do CHOU incluído o de mantemento a Ferrovial, “un pelotazo por 15 anos e máis de 140 M€ ”, denunciou.
Para a deputada, o tempo dirá si esta adxudicación forma parte do “sistema de corrupción institucional que practica o Partido Popular alá onde está”. A día de hoxe, insistiu sabemos que foi unha “privatización encuberta” e unha merma das condicións laborais e vulneración dos dereitos aos traballadores e traballadoras. “Falta persoal, non son cubertas con axilidade as baixas, non son remunerados economicamente ou en tempo libre os fins de semana traballados e os traballadores e traballadoras non contan cun local digno para facer os descansos.
A parlamentaria preguntou ao goberno se vai continuar coa súa “pasividade” ante cen días de folga dos traballadores e traballadoras de Ferrovial e se vai intermediar para buscar unha solución.
Pola súa parte, o conselleiro de sanidade, Jesús Vázquez Almuíña respondeu que a Xunta levou a cabo unha reorganización de moitas instalacións e nos contratos das adxudicacións existe a obriga de respectar os dereitos dos traballadores e traballadoras e afirmou que a administración “non pode inmiscuirse nas negociacións entre traballadores e empresas”.
A parlamentaria, replicou que a resposta do concelleiro evidencia a falta de compromiso da Xunta e cualificou de “inaudito” o desleixo do goberno cos traballadores en folga polo que volveu a reclamar a implicación da Xunta “sentándose na mesa de negociación”.
