BNG pide abrir o Pazo de Meirás e que a primeira actividade sexa unha homenaxe ás vítimas da represión

Luís Bará
Luís Bará: “o Pazo de Meirás debe ser un gran centro internacional de divulgación, investigación e defensa dos valores democráticos e dereitos humanos contra as ditaduras e os fascismos”
BNG pide abrir o Pazo de Meirás e que a primeira actividade sexa unha homenaxe ás vítimas da represión

O parlamentario do BNG, Luís Bará lembra que desde o pasado 10 de decembro o Pazo de Meirás permanece pechado,  circunstancia, que  na súa opinión, “vulnera a lexislación vixente en materia de Patrimonio cultural”. A finais  do mes de  xaneiro, engade o nacionalista pospúxose o acceso aos espazos públicos por mor da situación sanitaria pero hoxe en día, e despois de catro meses, “da entrega das chaves non ten xustificación o seu peche”, afirma.

Ante esta situación, o BNG propuxo no Parlamento galego tres medidas concretas: “a apertura inmediata do Pazo de Meirás nos seus espazos exteriores, que a primeira actividade prevista para o mes de abril sexa unha grande homenaxe pública a todas as vítimas da represión e espolio así como as entidades e persoas que loitaron pola recuperación do Pazo como mostra de recoñecemento e dentro do debate sobre os usos de Meirás, estudar a posibilidade de convertelo nun grande centro internacional de divulgación, investigación e defensa dos valores democráticos e dereitos  humanos, fronte as ditaduras e os fascismos”.

Para o deputado do BNG urxe abrir os espazos exteriores do Pazo de Meirás co fin de acadar a apropiación cidadá e polo simbolismo do lugar.

Neste sentido, cumpre lembrar que o BNG levou ao Parlamento galego diferentes iniciativas para a recuperación do Pazo de Meirás e polo seu  uso público así como de  reparación das vítimas da ditadura e contra o espolio que supuxo a usurpación deste ben patrimonial  ao seu lexitimo dono, o  pobo galego.

BNG pide abrir o Pazo de Meirás e que a primeira actividade sexa unha homenaxe ás vítimas da represión