A portavoz nacional, Ana Pontón, fixo unha visita á escola oficial de idiomas de Santiago de Compostela, da man do seu director, Gonzalo Constela, xunto co portavoz parlamentario de Educación, Manuel Lourenzo, e da portavoz municipal, Goretti Sanmartín. A líder nacionalista avanzou que o BNG vai levar tanto ó concello como ao Parlamento o debate para poñer en marcha unha nova sede, -vella e sentida reclamación na cidade-, que poña fin a máis de vinte anos dun centro que naceu nunha localización provisional e polo que pasaron máis de 30.000 estudantes.
Entre eles a propia líder nacionalista, como recordou a propia Pontón. “Este centro forma parte da construción da cidade pola súa achega”, indicou, tras destacar que á EOI asístese por diferentes motivacións, desde polo pracer de aprender idiomas a para conseguir unha oportunidade para mellorar as expectativas laborais.
“Resulta clave darlle un impulso á aprendizaxe de linguas desde a capital do País e iso pasa por ter unha nova escola de idiomas á altura das necesidades actuais, que permita contar cos medios para impartir o ensino de idiomas cunha metodoloxía actualizada así como ampliar a oferta de linguas”, recalcou.
Pontón, que destacou a calidade do profesorado, lembrou que, tras dúas décadas de traballo da man dun profesorado de moi alto nivel e entrega, se ten convertido nun emblema da calidade do ensino público en Galiza. E cun balance non só numérico senón tamén para a mellora da formación lingüística de Santiago e Galiza, cun labor incuestionábel de modernización do ensino e integración social, o BNG insiste na urxencia de que a Xunta inclúa nos orzamentos unha partida para o novo edificio da Escola Oficial de Idiomas, unha demanda que a formación nacionalista leva anos apoiando, pero que goberno do PP segue sen concretar, desoíndo unha reivindicación xusta e urxente.
