- Noa Presas pregunta ao goberno se aceptará que os galegos e galegas paguemos máis na factura da luz polo posible incremento do canon eólico ou plantará cara a Madrid
- A deputada do BNG formulou unha pregunta ante o anuncio do Goberno central de cargar no recibo da luz o canon que a Xunta cobra ás eólicas e que pode supor un incremento de 13 euros de media ao ano
Ante o anuncio do goberno central de cargar no recibo da luz o canon que a Xunta cobra ás eólicas, a deputada do BNG, Noa Presas formulou unha pregunta parlamentaria na comisión de industria sobre as previsións da Xunta a este respecto.
Na súa intervención, a nacionalista lembrou que o BNG foi crítico co estabelecemento do canon eólico porque “é un tributo que penaliza a enerxía eólica” ademais de supor na súa implantación un paradoxo por coincidir coas axudas á produción en forma de primas ou tarifas reguladas.Neste sentido, recalcou que “Incentivar” e “desincentivar, primando e gravando” resulta un disparate. Presas engadiu, este modelo supuxo a renuncia da Xunta á participación pública do Goberno Galego nos proxectos eólicos e impulsou un canon que será pagado polas persoas consumidoras.
En opinión da parlamentaria, a operación do Partido popular tombando toda a política eólica do goberno bipartito, consolidou “inseguridade xurídica” ao que sumou un canon como “ xustificación” ante a sociedade por mor da perda de participación pública.
O canon que a Xunta cobra á eólica, explicou a nacionalista, recadará no ano 2017, 22,9 millóns de euros e segundo as cifras que manexa a CNMC sobre clientes do servizo eléctrico en Galiza, ao redor de 1,7 millóns, supón que a “cada un dos consumidores galegos tocaríalle abonar case 13 euros anuais de media”.
Ademais do canon eólico tamén existen, o canon hidráulico e a ecotaxa, que pagan as empresas eléctricas á Xunta, e que, teoricamente, tamén poderían sumarse a ese hipotético suplemento territorial a pagar polos galegos/as.
“Nun momento de grande preocupación polo prezo da electricidade, nun momento de incerteza sobre a existencia de abusos nesta tarifa”, é hora de que a Xunta fale claro: Qué vai facer diante desta sobrecarga, calar ante Madrid ou non?, volveu preguntar a nacionalista.
Para a parlamentaria o incremento do recibo da luz polo canon eólico representa una “discriminación” ás persoas consumidoras galegas que soportan non obter ningún beneficio por vivir nun territorio excedentario na produción eléctrica e mesmo son penalizados por ese feito.
Noa Presas reiterou, “dende o BNG cremos que debe existir un prezo da electricidade asociado á situación de territorio excedentario ou deficitario, e no caso de ser excedentario, como acontece en Galiza, debe repercutir positivamente na nosa e asumir algún beneficio en compensación das externalidades negativas producidas polo sector eléctrico”.
Pola súa parte, o director xeral de Industria, Bernardo Tahoces criticou os cálculos da deputada sobre o incremento derivado do canon eólico e afirmou que o suplemento territorial calculase en función da facturación das peaxes polo que os galegos non pagarán ningún suplemento ao que a parlamentaria preguntou quen pagará entón ese recargo aplicado xa noutras comunidades?. Noa Presas recalcou que os anuncios públicos do goberno central solicitando datos de Galiza sobre o canon eólico seguen creando “grande preocupación” entre as persoas usuarias do subministro eléctrico, a pesar, dixo, das manifestacións da consellería de Industria.