GALEGAS 2020

O BNG lanza un póster de Ana Pontón apelando ao cambio galego

Ilustración Ana Pontón
Ilustración Ana Pontón

Forma parte da campaña para redes e, cunha imaxe icónica de estética cómic, proclama o “cambio galego” e chama a conseguilo baixo o lema “we can do it!”

A ilustración á da muralista Lidia Cao, xove creadora de Ordes de proxección internacional

O BNG lanza un póster de Ana Pontón apelando ao cambio galego

O BNG lanza un póster da candidata á Presidencia, Ana Pontón, que pretende converter en imaxe icónica da campaña apostando por un retrato con estética de cómic nun formato dirixido ás redes sociais, onde a líder nacionalista ten un elevado nivel de seguimento e coñecemento, con milleiros de seguidores e seguidoras coas que interrelaciona a diario e de xeito directo.

A imaxe vai acompañada dunha das mensaxes centrais da campaña: o cambio galego, subliñada cunha apelación directa á facelo posible a través da frase we can do it!, en liña con outra das ideas claves do discurso de Ana Pontón nesta cita coas urnas: o cambio real é posible da man do BNG se todas as persoas que queren abrir un tempo novo en Galiza se mobilizan de forma masiva o 12 de xullo.

E implica tamén unha referencia directa ao empoderamento das mulleres, simbolizado nunha candidata que aspira a facer historia converténdose na primeira muller presidenta de Galiza. De feito, o we can do it! é amplamente utilizada polo feminismo como slogan reivindicativo nunha das súas imaxes pop máis recoñecibles. É o momento de ter unha muller presidenta, nun contexto en que hai políticas convertidas en referentes do que as mulleres poden aportar cunha maneira diferente de exercer o liderado, tales como a congresista por Nova York, Alexandria Ocasio-Cortez, a presidenta de Nova Zelanda, Jacinda Arden ou a primeira ministra de Finlandia, Sanna Marín.

A ilustración é autoría de Lidia Cao, unha xove artista de Ordes muralista de excepción, nun novo exemplo da aposta do Bloque polo talento e a creatividade do país á hora de transmitir as súas mensaxes de campaña, seguindo a pauta do que ben facendo a formación desde que Ana Pontón asumiu o liderado.

A propia autora explica que as cores empregadas, -un fondo de azuis que rememoran a luz dun amencer-, “fan referencia a un novo día, a un novo tempo que está por vir, a unha nova Galiza xunto a Ana Pontón”, ao igual que os motivos vexetais, “unha alegoría duns brotes dándolle valor a nosa terra e apostando polo noso”. O BNG lanzará unha tirada limitada do póster para agasallar as persoas que acudan aos mitins durante a campaña.

 

O BNG lanza un póster de Ana Pontón apelando ao cambio galego