O BNG critica que a Xunta manteña o recorte no servizo de pediatría en Zas ignorando a nais e pais

Montse Prado
Montse Prado

Montse Prado tamén recriminou o maltrato ás persoas integradas na plataforma Zas sen recortes que pretendían falar con Feixóo nunha visita ao concello

O BNG trasladou ao Parlamento o recorte do 50% no servizo de pediatría no Concello de Zas que supón un prexuízo para os 334 nenos e nenas deste municipio, de tal xeito que desde o pasado xuño os pais e nais que precisan levar ao seus fill@s ao pediatra fora do horario recortado deben desprazarse até Vimianzo, Camariñas ou até o Hospital de Cee.

A esta redución nas horas de atención súmase o feito de que non se cobren as ausencias no servizo de pediatría.

Como consecuencias: “Empeora a calidade asistencial pediátrica aos nenos e nenas do concello, -por exemplo xa se reduciron as revisións aos menores de dous anos por falta de tempo-, recorridos longos para ser atendidos e atención por facultativos non especializados”, indicou a portavoz parlamentaria de Sanidade, Montse Prado.

Os recortes do PP tamén teñen efectos negativos en termos económicos, pois deben asumir o custe dos desprazamentos, e de conciliación laboral para as familias.

“A saúde é un dereito fundamental e non hai asistencia sanitaria sen profesionais suficientes que a presten”, salientou Prado, na pregunta en pleno ao titular de Sanidade, Jesús Vázquez Almuíña, a quen criticou que non aportara concreción algunha. “Como sempre ven aquí a falar do seu libro”, ironizou.

Prado tamén denunciou que pais e nais “non están recibindo resposta por parte da Consellería e séntense enganados pois prometéronlles un protocolo para saber como actuar diante dunha urxencia fora do horario de consulta e seguen agardando por el. Por que non trasladan por escrito ao centro de saúde de Zas o protocolo?”, interpelou a deputada.

A parlamentaria nacionalista aproveitou para criticar o trato “indigno” que as persoas da plataforma Zas sen recortes recibiron o 21 de febreiro na visita do presidente da Xunta ao municipio. “Foron custodiad@s na praza do concello e só se lles permitiu o desprazamento baixo vixilancia, ademais de ser fotografados por escoltas do presidente como se de delincuentes se tratara cando só pretendían trasladar o problema”, argumentou Prado.

A deputada demandou de Almuíña que “atenda dunha vez” as demandas dos pais e das nais, que estiveron representados no Pleno do Parlamento por unha delegación da plataforma Zas sen recortes acompañados do rexedor nacionalista, José Muíños.

Prado deixou claro ante o conselleiro que os recortes son consecuencia das políticas do PP que deterioran o servizo sanitario como comproban en Zas, pero que tamén é extensivo a outros municipios da Costa da Morte como Camariñas, Coristanco, Dumbría, Malpica, Muxía, Val do Dubra, Mazaricos, Cee, todos con problemas para que os menores reciban atención pediátrica de calidade.

Afíliate, faite do bloque
Anímate a dar o paso, súmate ao proxecto do BNG