BNG avanza as liñas de actuación no Congreso para o novo curso político

Néstor Rego
Néstor Rego

A formación nacionalista reclama ao Goberno do Estado que se comprometa coa Galiza a través de investimento nos vindeiros OXE e transferindo as competencias aínda pendentes para un maior autogoberno

Néstor Rego comprométese a defender os intereses da clase traballadora da Galiza e das maiorías sociais no novo curso político

BNG avanza as liñas de actuación no Congreso para o novo curso político

O deputado do BNG no Congreso, Néstor Rego, avanza as liñas de traballo que levará adiante a formación nacionalista na cámara baixa no comezo do novo curso político que estarán centradas en lograr alternativas de benestar que favorezan as maiorías sociais e a clase traballadora da Galiza. Así mesmo, estabelece como prioritario o cumprimento íntegro do acordo de investidura, o incremento do compromiso do Goberno do Estado nos Orzamentos Xerais do Estado e levar a cabo políticas realmente progresivas e transformadoras.

Co comezo do novo curso político o BNG centra as liñas de traballo en dar resposta aos novos desafíos do futuro máis próximo, que xa comezan a percibirse, como o aumento dos problemas sociais derivados da crise sanitaria da COVID-19. A formación nacionalista comprometeuse a “ofrecer alternativas a favor das maiorías sociais e a clase traballadora da Galiza ante a inadecuada política dos gobernos competentes, tanto galego como español no que ten a ver con problemas que se cronifican: emprego, sanidade...”.

“No ámbito do Estado marcamos tres cuestións prioritarias que se deben levar a cabo neste curso político” explica o deputado nacionalista. A primeira delas é o cumprimento do acordo de investidura asinado entre PSOE e BNG xa que “o acordo é co conxunto dos galegos e galegas a súa plena execución favorecerá o desbloqueo de problemas que leva arrastrando Galiza durante décadas”. Rego puxo o exemplo do investimento na construción e mellora das infraestruturas ferroviarias existentes que, outro dos temas que aparece recollido no acordo “é evidente o retraso da Galiza na dotación de infraestruturas ferroviarias en comparación co resto do Estado, así por exemplo, non existen servizos de cercanías no noso País e é urxente a súa implantación”.

Outra cuestión recollida no acordo é o compromiso do Goberno do Estado para alargar o autogoberno galego e estar disposto a transferir “todas as competencias que se recollen no Estatuto e as que foron reclamadas polo Parlamento da Galiza”. Para Rego, o Goberno ten que “estar disposto a convocar a Comisión de Seguimento para desbloquear esta situación e transferir as competencias e que Galiza teña, como mínimo, o mesmo tratamento que outras nacións do Estado español como Catalunya e Euskal Herria”. Así mesmo, o Estado ten que estar aberto en aspectos como a normalización da lingua galega, a solucións aos problemas dos emigrantes retornados ou a creación dos xulgados de violencia de xénero nas cidades de Compostela, Ourense e Lugo.

A segunda cuestión é reclamar ao executivo estatal aumentar o compromiso orzamentario e “eliminar dunha vez a discriminación dos Orzamentos Xerais do Estado de 2021 coa Galiza” Rego lembrou que nun contexto de orzamentos expansivos no caso da Galiza produciuse un descenso de 11% en relación aos últimos aprobados en 2018 e a formación nacionalista estivo disposta a negociar até o último minuto fixando como obxectivo que o orzamento para Galiza superase os 1.000 millóns de euros. “O obxectivo para este ano ten que ser aínda maior porque se trata de compensar e recuperar ese déficit e ter uns investimentos á altura das necesidades do País” apunta. Rego espera que a actitude do Goberno sexa diferente e “estean dispostos a negociar os novos orzamentos”. Neste sentido, Rego adianta que, nunha chamada do Ministro de Presidencia, Félix Bolaños, comprometeuse a manter, desde o executivo, unha postura de diálogo.

Outro aspecto fundamental é a aplicación dos Fondos Next Generation para a saída da crise da COVID-19. “No primeiro reparto, de 441 millóns de euros, non se respecta o criterio mínimo de poboación e Galiza perdeu entre 100 e 200 millóns de euros. Nós insistimos en que hai que colocar sobre a mesa outros criterios como, por exemplo, a dotación de servizos, a dispersión da poboación ou o seu avellentamento” explica Rego, "mais, cando menos, deben respectar os criterios estabelecidos".

“O reparto deses fondos non responde a criterios previamente coñecidos e avaliábeis de concorrencia competitiva. Este reparto é opaco e moito tememos que acabará beneficiando, non aos servizos públicos nin ao interese xeral, senón ás grandes empresas. Por iso, o BNG comprométese a traballar para que isto non aconteza” enfatiza Néstor Rego.

Por outra banda, no marco das políticas sociais, o deputado do BNG destacou a necesidade de que o Goberno do Estado leve a cabo o compromiso de derrogar as Reformas Laborais. Urxe, desta maneira, a Ministra de Traballo a “avanzar na recuperación de dereitos” para o conxunto dos traballadores e traballadoras. Nese sentido, Rego lembrou que o BNG ten iniciativas rexistradas para que, en canto non haxa unha nova lexislación, se recupere a lexislación de 2010 previa á Reforma Laboral máis benefeciosa e respectuosa cos dereitos das persoas traballadoras.

A formación nacionalista tamén denuncia a falta de compromiso do Goberno de coalición co que ten haber coa suba do Salario Mínimo Interprofesional. “O BNG reclama a suba do SMI até situarse en 60% do Salario Medio, tal e como recolle a Carta Social Europea” defende o deputado nacionalista. Do mesmo xeito, Rego convida o executivo a derrogar as reformas das pensións, retirando o Proxecto de Lei aprobado e reclama que as pensións máis baixas se equiparen ao SMI.

Suba do prezo da luz

“Non nos serve e parécenos escandaloso que a Ministra para a Transición Ecolóxica e o Reto Demográfico na súa comparecencia dixese cousas como que non é para tanto, que o prezo da luz podería ter subido máis” critica Rego. Así mesmo, indicou as medidas que a formación nacionalista propuxo na Comisión, a comezar pola regulación do sector, a “nacionalización do sector eléctrico porque se a enerxía é un ben esencial debe estar baixo control público”.

Dentro das medidas formuladas, Rego enumerou tamén as que “poden reducir o prezo da luz de maneira inmediata”. “É curioso que neste tema, un Goberno que gobernou por Real Decreto Lei ao longo do último ano e medio non se lle ocorra retirar da factura todos os custes regulados, os cargos e peaxes que non teñen que ver coa xeración e distribución da enerxía, así como limitar o prezo da hidráulica e a nuclear” asevera. 

Galiza como territorio como máis quilómetros de portaxes

Así mesmo, Rego anunciou que a súa formación seguirá traballando para conseguir unha AP-9 galega e libre de peaxes despois de conseguir que, no mes de agosto, se baixasen por primeira vez as portaxes da autoestrada en máis de 40 anos. “Neste momento o noso país é o territorio con máis quilómetros de peaxes do Estado español con máis de 331 quilómetros, máis de 18% dos quilómetros tarificados do español” explica Rego. “Seguiremos traballando para reducir as peaxes nas autoestradas galegas nesa perspectiva de que poidan ser eliminadas definitivamente” reivindica.
BNG avanza as liñas de actuación no Congreso para o novo curso político