O BNG, a través dunha pregunta parlamentaria ao goberno formulada polo deputado, Xosé Luís Rivas acadou o compromiso da Xunta para que “o casco urbano da vila de Ordes non siga soportando o tráfico pesado que transporta os refugallos á planta de SOGAMA e GESUGA”.
A directora xeral de Calidade ambiental e Cambio climático, Mª Cruz Ferreira Costa respondeu ao deputado nacionalista que “nos vindeiros días”, deixarán de circular polo casco urbano de Ordes os camións que transportan residuos cara a planta de SOGAMA en Cerceda, (A Coruña).
O parlamentario do BNG lembrou que xa van dez anos desde os veciños e veciñas de Ordes solicitaron resolver o tránsito do tráfico pesado conseguindo que se construíra a rolda leste para desconxestionar o tráfico, alternativa, dixo que non está sendo utilizada polos camións de refugallos con destino a SOGAMA e GESUGA.
O tránsito dos camións explicou Rivas, resulta especialmente grave na Avenida Alfonso Senra e na Rúa Recreo ocasionando retencións na circulación, vibracións, ruídos e mesmo cheiro e perda da carga que transportan ademais da alta velocidade á que circulan, sobre todo en horario nocturno.
Na actualidade a estrada que comunica Ordes e Cerceda por Virís, é de titularidade da Xunta de Galicia, e Ordes dispón dunha infraestrutura, a rolda leste pola que os camións que transportan os refugallos a SOGAMA e GESUGA poden circular sen atravesar o casco urbano de Ordes.
A directora xeral lamentou as molestias que este tráfico ocasionou aos veciños e veciñas do concello de Ordes e confirmou que o remate das obras “mellorará o transporte en xeral e en concreto co transporte do lixo a SOGAMA.
O parlamentario replicou que o BNG agarda o cumprimento deste compromiso cos veciños e veciñas do concello de Ordes para resolver os graves problemas do transporte e tráfico na vila.