GALEGAS 2020

Ana Pontón salienta que o BNG recuperou Fene para a veciñanza e que o 5A o obxectivo é liderar o cambio real en Galiza

Acto Fene
Acto Fene

Rivas pide sumar nas urnas na candidatura nacionalistas para acabar coas políticas “demoledoras” do PP na comarca de Ferrolterra

Sector industrial, infraestruturas, servizos públicos e reactivación económica, entre as prioriadades da formación para a comarca

Ana Pontón salienta que o BNG recuperou Fene para a veciñanza e que o 5A o obxectivo é liderar o cambio real en Galiza

A portavoz nacional e candidata á Presidencia, Ana Pontón, destacou no seu mitin en Fene que do mesmo xeito que o BNG logrou recuperar o goberno municipal par poñelo ao servizo da veciñanza, o obxectivo de cara ás eleccións galegas é liderar o cambio real en Galiza e conseguir que, por primeira vez na historia unha muller e nacionalista presida un goberno coas mans libres para defender os intereses do país.

“Este é o meu primeiro mitin como candidata á Presidencia de cara ás eleccións do 5A, aquí dimos unha lección de dignidade e de honestidade política grazas a Juventino Trigo e a todos os compañeiros e compañeiras que loitaron por devolverlle a Fene un goberno ao servizo da xente”, proclamou Pontón.

“O pasado 7 de febreiro recuperamos Fene para a veciñanza, da man dun goberno honesto, traballador, con capacidade para mellorar a vida das persoas, colocando os intereses da maioría social por diante. E o 5A imos recuperar Galiza abrindo un tempo novo, logrando un cambio real liderado polo BNG”, salientou a líder nacionalista.

Por iso, recalcou, o Bloque vai “saír a por todas” porque non chega “un mero re-cambio”. “Non son tempos nin de gobernos absolutistas nin de gobernos sucursalistas das forzas estais. É o momento dun cambio galego para ter unha presidenta coas mans libres, sen mordazas nin ataduras, que defenda os intereses deste país se mirar polo retrovisor nin a Génova nin a  Ferraz”, salientou.

“O noso centro de decisión é Galiza e temos un proxecto serio, solvente, fiable a favor dos galegos e das galegas, capaz de deixar atrás unha década de desfeita do Goberno do PP. E imos polo bo camiño, porque o BNG está á alza e cada día que pasa son máis as persoas que miran cara nós como a única garantía de cambio real, porque saben que temos políticas transformadoras e saben que non lles imos fallar”, argumentou.

En relación á comarca de Ferrolterra, criticou o “nefasto”  balance do Goberno de Feixóo “porque non foi capaz de sacar adiante nin unha soa das cuestións desta comarca” e avanzou as prioridades do BNG.

Ferrolterra terá cun goberno liderado polo Bloque “un aliado do sector naval” para defender os seus intereses e conseguir carga de traballo, “ao contrario do fiasco de PEMEX, pois o que ía ser a panacea acabou cunha investigación por fraude por parte do goberno mexicano”. O mesmo se pode dicir coa recuperación integral da Ría, unha eterna promesa sen cumprir, desaproveitando riqueza e postos de traballo, pero que é prioritario para o BNG.

E nada se fixo tampouco para modernizar as conexións ferroviarias entre Ferrol e A Coruña, “que soporta un tren do século pasado, pese a que miles de persoas se moven a diario entre ambas cidades por razóns de traballo, para facer xestións ou mesmo de ocio”, alegou. Neste sentido, destacou a creación do GALTREN para potenciar o transporte ferroviario de cercanías.

Nada tampouco para evitar a deslocalización de empresas, nin para evitar o deterioro progresivo do comercio local, pese a ser unha fonte de cohesión social e urbana e de creación de emprego. Un plan de revitalización do comercio de proximidade será parte da acción de goberno do BNG.

Unha década de discriminación

Pola súa parte, o candidato pola Coruña Xosé Luís Rivas criticou a década de maltrato con Ferrolterra “baileirando os servizos públicos” como a sanidade, e hoxe case non hai concellos na comarca con deficiencias na atención pediátrica, afectando a máis de 3.000 crianzas. “Imos reverter eses recortes”, proclamou.

Adiantar a construción das F-110

As “políticas demoledoras” do PP tamén penalizaron o sector industrial co peche de Polígal,  a situación “agónica” de ENDESA ou as gradas baleiras en Navantia e lembrou que 2.000 traballadores das empresas auxiliares corren o risco de quedar sen emprego, polo que reclamou adiantar o programa da construción das fragatas F-110 e dotar o estaleiro de persoal cualifado e recursos económicos para impulsar a contrucción naval e civil.

Recuperación bancos marisqueiros

Tamén aludiu ás consecuencias do Brexit  nas cotas pesqueiras que afectará ao sector pesqueiro das comarcas de Ortegal e Cedeira.  Rivas denunciou a situación dos mariscadores de Ferrol e Barallobre pese a estar nunha das rías máis produtivas se estivese executada a rexeneración das augas. “É preciso un Plan de recuperación dos bancos marisqueiros”, salientou.

“O desemprego, a crise demográfica, a contaminación  das rías e a  falta  de traballo nos estaleiros pode reverterse con outras políticas, -sinalou o candidato-, e o 5A  temos a oportunidade de abrir un tempo novo con Ana Pontón como presidenta e iniciar o cambio real que Galiza necesita e que só é posible da man do BNG”.

 

Ana Pontón salienta que o BNG recuperou Fene para a veciñanza e que o 5A o obxectivo é liderar o cambio real en Galiza