Ana Pontón: “Foi vergoñento como o Estado se puxo do lado da banca fronte as persoas estafadas polas cláusulas solo”

ana ponton-ap9-5
  • Considera que a xustiza europea emendou a plana ao Tribunal Supremo e pide celeridade na devolución dos cartos ilegalmente percibidos

O BNG valorou a sentenza do Tribunal de Xustiza da Unión Europea que obriga as entidades bancarias a devolver todo o cobrado de xeito ilegal a través de cláusulas solo aplicadas a miles de persoas nas súas hipotecas en Galiza e no conxunto do Estado.

“Emenda a plana ao Tribunal Supremo ao considerar que a banca estivo cobrando ilegalmente aplicando cláusulas abusivas a milleiros de persoas que tiñan subscrita unha hipoteca”, salientou a portavoz nacional, Ana Pontón, tras un acto con responsables municipais do BNG en Pontevedra.

Para a dirixente do Bloque, o Goberno central debería “repensar o papel que xogou en todo este proceso porque foi vergoñento ver como a avogacía do Estado estivo defendendo os intereses da banca e non da cidadanía que estaba a ser vítima dunha nova estafa bancaria”. Pontón considera que este novo episodio evidencia a necesidade “de ter unha lexislación máis clara no Estado español en relación coa banca para blindar aos clientes de calquera novo abuso”·.

O BNG demanda do Executivo de Rajoy e da Xunta “que se poñan traballar desde xa para que todos os cartos cobrados ilegalmente por parte da banca sexan devoltos ás persoas afectadas sen que haxa máis demoras”, indicou Pontón.

Afíliate, faite do bloque
Anímate a dar o paso, súmate ao proxecto do BNG