Ana Pontón chama a unha mobilización masiva e pon o BNG como a opción de cambio real nos concellos

Ferrol
Ferrol

O 26M insta a non resignarse nin co vello bipartidismo nin cos gobernos da decepción. De visita en Ferrol, puxo esta cidade como exemplo de que alternativa de futuro pasa polo proxecto do Bloque

Ana Pontón chama a unha mobilización masiva e pon o BNG como a opción de cambio real nos concellos

A portavoz nacional, Ana Pontón, reclamou desde Ferrol unha gran mobilización nas urnas o 26M e colocou ao BNG como a opción para un cambio real nos concellos, da man dun modelo municipal que xa demostrou que funciona e capaz de converter en referentes as vilas e cidades nas que goberna.

“Fago un chamamento á mobilización, a que o 26M haxa unha participación masiva para que a cidadanía se deixe sentir nas urnas”, salientou Pontón, “a aposta para todas as persoas que queren cambios transformadores é a papeleta do BNG, porque temos un proxecto sólido de futuro, pensado desde Galiza, demostramos que facemos as cousas ben, que temos capacidade para sacar o mellor dos concellos”.

Por iso, e de cara á cita electoral, Pontón pediu aos galegos e as galegas que non se resignen “nin co vello bipartidismo nin con esas fórmulas que nos dixeron que viñan cambialo todo pero non foron capaces de xestionar o día a día. O BNG é una alternativa segura para todas as persoas inconformistas que queren concellos dinámicos e comprometidos co galego, co comercio local, co feminismo e con mellorar a vida das persoas”, recalcou.

Unha “gran mobilización”, reiterou, é o que se precisa para que “toda esa corrente de simpatía cara o BNG se transforme en votos para construír un país mellor tamén desde os concellos”. Ferrol, onde participou nun acto de campaña xunto co candidato Iván Rivas, é un exemplo de que o Bloque é a mellor aposta para mudar o rumbo desta cidade a partir do domingo.

Ferrol “Ten un enorme potencial e se está como está é pola ineficacia dos últimos gobernos municipais que non foron capaces de poñer en marcha un proxecto transformador que mudase o pesimismo en ilusión e en futuro”, indicou.

“A alternativa en Ferrol é a candidatura do Bloque que encabeza Iván Rivas, cun proxecto claro, cun equipo sólido é a aposta segura para todas as persoas que neste momento están decepcionadas co que pasou e dicímoslle que non teñen que conformarse co vello bipartidismo que xa sabemos que da de si, nin resignarse a esa desilusión que xeraron aqueles que viñan cambialo todo e non foron nin capaces de xestionar o día a día. Todas esas persoas teñen no BNG a alternativa de cambio real que pode darlle un futuro a Ferrol”, argumentou.

No acto de campaña nesta urbe abordaron as propostas do Bloque para conformar concellos feministas que traballen a favor da igualdade e dos dereitos das mulleres.

Concellos comprometidas coa igualdade, cunha aposta para acabar coa discriminación das mulleres no acceso ao emprego, para loitar por unha sociedade máis igualitaria e facer dos concellos un axente máis de loita contra a violencia machista, “porque no actual contexto de involución, non podemos dar nin un paso atrás”, salientou Pontón.

Cláusulas de igualdade no acceso á emprego público, penalizar ás empresas que discriminan ás mulleres, apostar por facilitar a conciliación familiar e laboral, son algunhas das medidas. “Non se poden usar recursos públicos para financiar ningunha actuación que vaia contra os dereitos e as liberdades das mulleres ou que perpetúe discriminacións laborais”, concluíu.

Ana Pontón chama a unha mobilización masiva e pon o BNG como a opción de cambio real nos concellos