Ana Pontón advirte a Feixóo que nin a propaganda nin os cheques-bebe solucionan a crise demográfica

Só mudando o prisma para actuar sobre a economía e sobre a política social é posible afrontar e reverter a situación de colapso poboacional

Ana Pontón advirte a Feixóo que nin a propaganda nin os cheques-bebe solucionan a crise demográfica

A portavoz nacional, Ana Pontón, replicou ao presidente do Goberno da Xunta que as medidas anunciadas para combater a crise de poboación de Galiza  son unha nova entrega de propaganda ou de medidas que teñen demostrado a súa ineficacia, ademais de advertir que o “colapso demográfico” do país non se vai reverter aplicando políticas natalistas senón cunha intervención nas políticas económicas e sociais.

“A situación de colapso demográfico retrata o fracaso das políticas do PP nos últimos anos incluído o decenio negro de Feixóo, que responde a esta crise cunha fuxida cara adiante na que só aporta propaganda como a anunciada Lei de impulso demográfico, puro parche propagandístico que non ten ningunha medida nova e que na práctica non é máis que un remix de medidas natalistas fracasadas”, explicou.

O grave problema demográfico non se soluciona “con cheques-bebe de cen euros mensuais, nin con caixas de benvida, nin con cambiadores de cueiros nos edificios públicos”, -denunciou, nin tampouco co mesmo plan de retorno de emigrantes anunciado de fai un ano sen éxito. Unha proposta, esta última, que contrapuxo coa medida lanzada polo Goberno luso de fomentar con 6.500 euros a volta da xente moza que colleu as maletas.

Por contra, o Bloque considera vital “un cambio de prisma” se realmente se quere enfrontar a crise demográfica nunha dobre liña: intervención directa na economía para xerar emprego estable e de calidade e, ao mesmo tempo, unha política social integral que facilite a vida laboral e familiar.

“Hai que potenciar os sectores produtivos para xerar traballo estable e be remunerado, unha aposta clara pola investigación e o desenvolvemento recuperando o talento fuxido, facilitar o acceso a unha vivenda á xente moza e ter horarios compatibles coa crianza dos fillos e fillas”, indicou. En canto a pata das medidas sociais, o BNG defende o investimento público para contar cos necesarios equipamentos sociais, tanto para a infancia como para afrontar a dependencia, dúas cuestións que condicionan a opción de ter crianzas.

Neste sentido, avanzar na igualdade real e conseguir que a maternidade deixe de ser unha penalización no desenvolvemento profesional das mulleres son tamén, a xuízo da formación nacionalista, cuestións claves para axudar a reverter a crise demográfica.

Pontón subliñou que os datos máis recentes deixan en evidencia até que punto Galiza ten un problema poboacional que ameaza o seu futuro como país. “Temos as peores cifras demográficas da nosa historia, as peores de todo o Estado e de Europa, estamos ante un problema estrutural que requiren solucións de calado político lonxe da propaganda e das medidas parche ou fracasadas que volve anunciar o Goberno de Feixóo”, concluíu.

Adianto electoral

En relación á conformación do futuro goberno do Estado, e a preguntas dos medios, Pontón puxo o foco no feito de que “Galiza estea desaparecida” dun debate sobre a gobernabilidade do Estado que dura semanas, o que reflexe “unha irrelevancia política como país que ten graves consecuencias”. A líder do Bloque considera que se finalmente se tivesen que repetir as eleccións xerais sería atribuíble ao fracaso do PSOE e de Podemos é a incapacidade dos seus máximos responsables, -Pedro Sánchez e Pablo Iglesias-, para poñer o intereses xeral por riba dos seu intereses partidistas.