A deputada por Ourense e responsable de Acción Feminista do BNG, Noa Presas anuncia que o BNG pedirá, a través dunha iniciativa parlamentaria, que a Xunta de Galiza retire o patrocinio a competición deportiva “Pulpo Extreme 2017” de descenso urbano por que “discrimina ás mulleres deportistas” con contías nos premios “moi inferiores” a respecto dos deportistas masculinos.
A parlamentaria advirte que si a Xunta persiste no patrocinio á competición, incorrerá en “incumprimento da súa Lei de Igualdade” polo que o BNG pedirá explicacións na Cámara galega.
A deputada cualifica de “escándalo” que a mesma proba outorgue un primeiro premio masculino dotado con 1.000 euros e o feminino só con 300. Para a nacionalista, esta discriminación “cimenta as desigualdades” e as administración públicas non poden ser “cómplices” polo que reitera que a Xunta debe tomar medidas urxentes e corrixir esta situación ou ben retirar definitivamente o patrocinio ao certame deportivo.
Por outra parte, Presas tamén denuncia discriminación lingüística ante a publicidade e información do evento, “exclusivamente en castelán”, a pesar de estar patrocinado e coorganizado polas administración públicas.
