A deputada do BNG, Montse Prado formulou hoxe unha pregunta ao goberno ante a nova contratación a empresa de mantemento Ibérica S.A despois de ter incumprido o contrato na adxudicación do ano 2013 polo que a administración lle ten reclamado diversas cantidades económicas.
Para a deputada do BNG, o SEGAS mantén “un trato de favor reincidente” e inxustificable. Contratar novamente a esta empresa, afirmou Prado, é “corrupción” e dende o BNG seguiremos denunciando estas irregularidades.
“Hai corrupción a través do DOG”, denunciou a parlamentaria quen lamentou que o PP “encubran a este tipo de empresas” polo que pediu “decencia” e que o SERGAS rescinda o contrato.
A nacionalista volveu a preguntar como se xustifica que o Sergas lle adxudique novos contratos a unha empresa á que o propio organismo lle reclama cantidades e cualificou de “despilfarro” externalizar servizos mentres o persoal do propio SERGAS é baleirado de funcións sistematicamente.
IBERICA INCUMPRE UN CONTRATO DE 34 M€
Prado explicou que o 30 de novembro do ano 2016 rematou o contrato adxudicado en xuño de 2013 pola Xunta de Galiza a Ibérica de Mantenimiento S.A, para o servizo de mantemento integral de equipamento electromédico e outro equipamento, que se fixo por un importe aproximado de 34 millóns de euros.
Con esta adxudicación o Sergas puxo en mans privadas o mantemento de todo tipo de aparataxe, incluídos servizos críticos e vitais como os quirófanos, UCIS, urxencias, radiodiagnóstico, autoclaves, bombas de infusión, respiradores, incubadoras, ventosas fetais, monitores, detectores de illamentos, esterilizadores, respiradores, mesas cirúrxicas, desfibriladores... Todo o aparataxe destinado a diagnosticar e tratar aos doentes.
“Desde a privatización do servizo de electromedicina foron reiteras as denuncias do deterioro, até límites de por en risco a asistencia sanitaria, da prestación do servizo que por parte da empresa concesionaria realiza nos centros” dixo a nacionalista.
O Bloque Nacionalista Galego denunciou en reiteradas ocasións esta situación a través de diversas iniciativas reclamando unha rectificación da Consellería de Sanidade. Por outra parte, os traballadores e traballadoras e responsábeis dos centros sanitarios, realizaron denuncias das deficiencias na electromedicina, risco na asistencia, e a anulación e suspensión de probas diagnósticas por non ter os equipos reparados. Tamén hai constancia, engadiu, que os técnicos e técnicas de diferentes centros sanitarios do Sergas emitiron informes desfavorábeis sobre o traballo desenvolvido pola empresa adxudicataria así como de sistemáticos incumprimentos das condicións do contrato.
Para a deputada, as privatizacións da Xunta teñen un único obxectivo, “desmantelar un servizo público que funcionaba perfectamente”, reducir custes, profesionais cualificados que coñecían o estado dos equipos e das instalacións. Ante isto, “o SERGAS preferiu negociar cunha empresa que non cumpriu co contrato”.
Resulta moi difícil entender como o Goberno galego, tras detectar as evidentes irregularidades da empresa, volve a adxudicarlle un servizo que o propio Consello de Contas cuestionou no seu informe.
A deputada recalcou que o SERGAS ten retidas partidas económicas ao non seren xustificados algúns servizos e mesmo reclamou as cantidades pagadas por servizos non realizados polo que preguntou, outra vez, si a empresa Ibérica S.A contará cunha nova adxudicación de contratos de mantemento para Vigo, Pontevedra Lugo e Ourense.
O BNG PIDE DECENCIA AO SERGAS E QUE RESCINDA O CONTRATO A IBERICA
Pola súa parte, o xerente do SERGAS, Antonio Fernández Campa xustificou a externalización do servizo na normativa que establece sexan os fabricantes dos aparatos os que garantan os servizos. A nacionalista reprochou ao titular do SERGAS eludir, unha vez máis, responder ás preguntas formuladas e recalcou que “non ten xustificación ningunha” adxudicar de novo un contrato a unha empresa que suma denuncias por incumprimento reiterado. “Sabemos que hai xerencias do SERGAS que lle están a reclamar cantidades, hai corrupción a través do DOG” e lamentou que o PP “encubra este tipo de empresas”.