Tras lembrar os espantosos incendios que afectan as catro provincias galegas, e de maneira dramática a de Ourense e o sur de Pontevedra, cuestionou que o Parlamento galego mantivera a orde do día do pleno cando un número importante de concellos seguen apagando luns. “Resúltame difícil estar hoxe aquí con normalidade debatendo a lei de fomento da implantación de iniciativas empresariais en Galiza despois de días de grande preocupación e de ter alertado hai máis dunha semana das consecuencias dos lumes que se estaban a producir en Ourense”.
Resulta “inaudita” a ausencia do presidente do goberno nesta sesión pero aínda máis que non dea a cara e compareza na Cámara galega para explicar a grave situación xerada polos incendios en todo o país.
LEI DEPREDADORA CONTRARIA A IMPULSAR O TECIDO INDUSTRIAL GALEGO
No debate para a tramitación da lei de iniciativas empresariais, Noa Presas tildou o texto de “lei da depredación” que non conta nin co apoio da oposición nin da sociedade. É unha lei que incide na “desregulación, arbitrariedade, desequilibrio territorial, boicot aos montes comunais, desprotección ambiental, redución doa participación pública, baleirado competencial, afasta aos concellos, veciñanzas e colectivos desvinculando á sociedade da custodia dos territorios, afonda na incineración, abre a porta a biomasa non tradicional e privilexia a eucaliptización”.
Esta lei, engadiu, é “un auténtico cóctel molotov” que camiña na dirección contraria da que precisamos en Galiza polo que pediu a súa retirada e abrir un novo debate e lembrou que o Partido popular perdeu varias ocasións para acadar o “consenso” para o tecido económico, industrial e forestal. Presas lamentou que, unha vez máis, o Partido popular siga enrocado e non estea disposto a mover un ápice a súa postura sobre unha lei que “prexudicará gravemente” ao noso país nos ámbitos da enerxía eólica, minería, protección da natureza, auga, montes e solo.
Neste procedemento “Express parlamentario”, explicou a deputada, o PP introduciu máis artigos e modificacións como a lei de minas da que dixo, é do ano 73, unha lei franquista que logo foi modificada en Galiza no ano 2008.
A nacionalista insistiu na retirada da lei e acosou aos populares de “vender un proceso dialogado que non existiu” e que esta ameza para Galiza pase con “disimulo” e reducindo os seus trámites.
Non queremos este modelo de “depredación” contra a que seguiremos loitando como demostramos onte en todas as cidades galegas porque somos “un pobo vivo que sabe que as mobilizacións poden cambiar as cousas” e así o faremos o vindeiro domingo cando a xente tome as rúas para paralizar esta lei e reivindicar outra política forestal.
A lei de fomento de implantación de iniciativas empresariais en Galiza foi aprobada cos votos do grupo maioritario do Partido popular.
