O parlamentario do BNG, Luís Bará formulou hoxe unha pregunta ao goberno sobre os trámites do expediente sancionador contra a entidade organizadora do evento taurino o pasado 3 de setembro no concello de Moraña, pasados os tres meses da presentación da denuncia.
Bará lembrou que o 22 de setembro, o director Xeral de Emerxencias e Interior respondeu a unha pregunta do BNG formulada polo propio deputado anunciando que se abriría un expediente ao respecto porque a Xunta de Galiza non autorizou o devandito espectáculo taurino. Transcorridos tres meses, dixo Bará, as asociacións que presentaron a denuncia “non recibiron ningunha información sobre a tramitación administrativa” polo que preguntou se o espectáculo pode ser considerado legal ao negar a Xunta a súa autorización.
Para o deputado do BNG, a resposta do director Xeral de Emerxencias, Luís Menor confirmando o arquivo do expediente constata a intención da Xunta de “tapar as irregularidades cometidas pola entidade organizadora e do propio concello de Moraña”.
Na súa intervención, o deputado do BNG volveu a denunciar que o evento taurino do mes de setembro contou coa asistencia do grupo municipal de goberno e a alcaldesa de Moraña, circunstancia, que na súa opinión, evidencia que o Partido popular di unha cousa e ao mesmo tempo fai o contrario “ colaborando e apoiando este tipo de eventos.
Transcorridos tres meses e tras o arquivo do expediente dun feito que cualificou de “grave”, o deputado reiterou que o PP demostra, unha vez máis, a súa “complicidade” coa organización e promoción de espectáculos taurinos alleos á nosa tradición cultural.
Finalmente, o parlamentario do BNG tamén acusou ao Partido popular de non cumprir a lei e destinar fondos públicos a eventos contrarios á recente lei aprobada para a protección de animais.
Bará insistiu na “ilegalidade” do espectáculo que non contou nin con servizo médico nin control para a entrada de menores e que incide no “maltrato animal” polo que pediu que estes eventos non sexan autorizados, fomentados e patrocinados con fondos públicos.
