Comunicado da Executiva do BNG pola prisión incondicional dos membros do Govern de Catalunya

Comunicado da Executiva do BNG pola prisión incondicional dos membros do Govern de Catalunya

Diante da orde de prisión incondicional decretada esta tarde contra as e os membros do Govern de Cataluña, a Executiva Nacional do BNG quere manifestar o seguinte:

  1. A orde de prisión decretada contra o lexítimo Goberno de Cataluña resulta dunha gravidade extrema e marca un auténtico punto de inflexión na deriva represiva e autoritaria do Estado español. Sen separación de poderes e sen independencia xudicial non hai democracia merecente de tal nome. E a decisión tomada hoxe é unha decisión claramente concertada entre poder xudicial e político, que deixa ás claras que no Estado español non hai hoxe separación de poderes, senón uns órganos xudiciais absolutamente politizados e ao servizo do partido no Goberno. 
     
  2. O paso dado hoxe pola xuíza Lamela, na liña marcada polo Goberno de Mariano Rajoy e os poderes do Estado, abre a crise democrática máis grave dos últimos 40 anos e instala o Estado español nun comportamento neofranquista. Calquera persoa demócrata, sexa ou non nacionalista, opine o que opine do proceso soberanista catalán, ten hoxe motivos relevantes para estar fondamente preocupada pola involución democrática que vivimos. O camiño de represión comezado nestas semanas aplícase hoxe contra o independentismo catalán, mais é unha porta aberta que ameaza desde agora a calquera persoa, colectivo ou proposta política e social transformadora ou incómoda para o poder. 
     
  3. A monarquía, o Ibex 35, os medios do Ibex 35, o Goberno do Partido Popular e os partidos sistémicos - con especial mención para o apoio expreso do PSOE en todo este proceso- están comandando unha actuación represiva contra as e os representantes da vontade popular maioritaria do pobo catalán, expresada democraticamente nas urnas. O español é hoxe un Estado democraticamente falido que manda a prisión a líderes de entidades cívicas e a conselleiros dun Goberno escollidos democraticamente, que ordena ás forzas policiais actuar violentamente contra cidadáns indefensos que queren poder depositar o seu voto nunha urna, que persegue e pecha páxinas webs e asalta empresas e medios de comunicación. Este comportamento carga de razóns o nacionalismo galego cando defendemos que a mellor maneira de garantir democracia no noso País é exercendo a soberanía.
     
  4. Nada desa represión vai poder mudar o fundamental: o problema do Estado español, e o que fai que sexa en esencia un Estado de escasa calidade democrática, é a súa negativa a recoñecer a existencia de nacións diferentes da española e, en consecuencia, respectar os seus dereitos. O goberno de Mariano Rajoy, dirixente do partido máis corrupto de Europa, podería decidir aumentar aínda máis a represión e mandar a prisión ao Goberno catalán, á Mesa do Parlamento, aos 72 deputados independentistas, aos 700 alcaldes que apoian a independencia e aos líderes das entidades cívicas soberanistas de Cataluña. Todo iso non lle serviría de nada, nin a el nin a ningún outro. O problema de fondo é político: o recoñecemento pleno dos dereitos nacionais de Galiza, Euskadi e Cataluña por parte do Estado español, a comezar polo dereito de autodeterminación, xa recoñecido internacionalmente pola ONU. Ou se dá ese recoñecemento e se articulan formas de que a vontade popular deses pobos poida expresarse de forma libre, democrática e con garantías plenas -como en Escocia co Reino Unido ou en Quebec co Canadá- ou a vía represiva española non só non rematará co conflito, senón que o agravará. 
     
  5. Desde o BNG queremos mandar un abrazo fraternal e solidario ás familias, forzas políticas e entidades cívicas soberanistas de Cataluña, das que nos sentimos próximas e irmás na defensa da democracia, a liberdade, os dereitos sociais e o dereito a decidir dos pobos.