O BNG trasladou ao Parlamento a reclamación do sindicato CIG para que as empresas establezan un rexistro diario do cómputo da xornada laboral, coa finalidade de evitar unha estafa que prexudica cada día a milleiros de traballadoras e traballadores, pero que tamén supón unha estafa á caixa da Seguridade Social da que se sufragan as prestacións sociais, frea a creación de postos de traballo e incrementa a sinistralidade laboral.
A portavoz de Política de Emprego, Montse Prado, defendeu a toma en consideración desta proposición de lei para poñer coto a unha realidade do mercado laboral no que moitos traballadores e traballadoras “saben cando empezan pero non cando acaban, as súa leoninas xornadas laborais”, facendo milleiros de horas extra polas que non reciben ningunha compensación, denunciou, “mesmo contratos a tempo parcial de catro horas que na práctica encobren xornadas completas de oito horas ou máis”.
Ademais da grave penalización económica en termos de salario para a persoa afectada, esta estafa tamén repercute na caixa da Seguridade Social, “posto que son horas que non cotizan”, e o exceso de xornada ten unha repercusión directa no incremento da sinistralidade laboral, tanto nos centros de traballo como nos desprazamentos e, finalmente, as horas extras realizadas ilegalmente frean a creación de emprego.
Por iso, o Bloque defende a reclamación formulada pola CIG para que se leven a cabo as modificacións necesarias no Estatuto dos e das Traballadoras nos artigos 34 e 35 e do artigo 7, neste caso para facer obrigatorio que as empresas garantan este rexistro diario que debe conservarse durante tres anos e ser facilitado ao traballador ou traballadora ou aos seus representantes se así o solicitan.
Prado salientou que hai sectores, como a “rescatada” banca, no que as horas extras non pagadas xa superan as horas abonadas. “ A banca é a primeira defraudadora da Seguridade Social”, concluíu.