O deputado do BNG, Luís Bará parabenizou ás forzas sindicais e persoas que hoxe participaron na protesta masiva nas inmediacións do Parlamento galego para reivindicar melloras laborais e salariais na Xustiza en Galiza.
O parlamentaria participou na concentración e trasladou o seu apoio e do BNG a todas as folgas dos traballadores e traballadoras no ámbito da xustiza e cualificou de exemplo as mobilizacións en contra dos recortes de persoal, medios e condicións salariais ao que sumou o deterioro da administración de xustiza. O deputado nacionalista anunciou que o BNG seguirá apoiando todas as reivindicacións e a defensa dunha xustiza que responda ás necesidades das persoas.
O deputado criticou que a Xunta non esixa ao Ministerio de Xustiza as prazas vacantes en Galiza para seren ocupadas polos galegos e galegas que están fora e o que fan, dixo, é “amortizalas ilegalmente” sen autorización do Ministerio. Sr. Rueda, conselleiro de Xustiza, “este delito non quedará impune”, afirmou o nacionalista.
Bará cualificou de “escándalo” que se segan mantendo discriminacións salariais e laborais no ámbito da xustiza galega polo que avanzou que o grupo parlamentar do BNG persistirá en levar a voz de todos os traballadores e traballadoras da xustiza ao Parlamento para seguir defendendo as súas demandas.
O deputado do BNG lembrou que a “unidade é a forza dun pobo”. Hoxe os traballadores e traballadoras da xustiza demostraron que van gañar esta batalla e que ese éxito repercutirá en toda a sociedade.