Ana Pontón inclúe como reivindicación do BNG no 25X a devolución dos terreos do porto á cidade da Coruña

Ana Pontón diante da Autoridade Portuaria da Coruña
Ana Pontón diante da Autoridade Portuaria da Coruña

“Chego antes desde Coruña a Ferrol en bicicleta que EN tren, exemplo da discriminación do Estado á cidade”, contra a que pide mobilizarse na manifestación do Día da Patria

Ana Pontón inclúe como reivindicación do BNG no 25X a devolución dos terreos do porto á cidade da Coruña

“Desde A Coruña se quixéramos ir a Ferrol por ferrocarril chegaríamos antes en bicicleta que neste tren, porque a modernización deste transporte non chega”, explicaba a portavoz nacional, Ana Pontón, como un dos moitos exemplos de discriminación do Estado coa cidade da Coruña e co conxunto do país, que o BNG está a denunciar cunha campaña de actos previa á celebración do 25 de Xullo.

“É un día para festexar que somos unha nación no mundo”, salientou, “pero ao mesmo tempo queremos converter o Día da Patria nunha gran manifestación social contra ese agravio”, e encher as rúas composteláns na manifestación nacional en Santiago para dicirlle ao Estado “que estamos fartos e fartas de que Galiza sexa a última carta da baralla”.

Só con ese enfoque se entende “a falta de respecto” que supón que o Goberno central vete a transferencia da AP9 como primeiro paso para acabar coa estafa dunhas peaxes “entre as máis caras do Estado nun país onde temos os salarios máis baixos”, e o presidente da Xunta “alegue como dificultade 7M€ ao mesmo tempo que Rajoy pon enriba da mesa 4.000 M para rescatar as radiais madrileñas”, denunciou.

Ana Pontón no mercado de San AgostiñoNo caso da Coruña, o BNG elixiu a sede da Autoridade Portuaria para denunciar a discriminación, “porque se intenta facer negocio con bens públicos”. “Desde o Bloque reclamamos que eses bens se devolvan á cidade da Coruña, debe ser unha prioridade de país porque non creemos nunha negociación na que se pretenda que @s coruñesas paguen por uns terreos que se lle roubaron ao pobo da Coruña”, alegou.

Neste sentido, Pontón reclamou ao Concello e á Xunta que se impliquen nesta reivindicación “para acadar a devolución gratuíta destes terreos que son de todos e todas, ese sería un trato xusto”. O BNG igual que a comisión, salientou, “leva traballando moito para conseguilo e por iso neste 25 de Xullo facemos nosa esta reivindicación da devolución destes terreos afectados”, concluíu.

Neste acto da precampaña do Día da Patria arrancou cun reparto de información das propostas nacionalistas no mercado de Santo Agostiño, no que tamén participou a portavoz municipal Avia Veira, responsables políticos locais e comarcais, militantes e simpatizantes.