GALEGAS 2016

Ana Pontón compromete unha nova lei de protección animal na visita ao centro Vacaloura

Ana Pontón no centro Vacaloura
Ana Pontón no centro Vacaloura
Ana Pontón compromete unha nova lei de protección animal na visita ao centro Vacaloura

A candidata á Presidencia da Xunta polo BNG, Ana Pontón, visitou esta mañá o Santuario Animal Vacaloura, ubicado no Concello de Santiago, unha iniciativa pioneira no noso País a favor dos dereitos dos animais. Ana Pontón interesouse polo traballo que realizan as persoas que promoveron e/ou colaboran como voluntarias no Santuario para a recollida e coidado dos animais e tamén para a concienciación da necesidade de que a sociedade asuma como valores o respecto aos dereitos e ao benestar animal.

Ao mesmo tempo, Ana Pontón aproveitou para explicar as propostas do BNG en materia de Benestar animal, un programa en que destaca a prohibición da realización de touradas na Galiza e outros espectáculos con animais (en circos, tiro ao pombiño, etc).

Ana Pontón explicou que o BNG defende a elaboración dunha nova lei de protección de animais domésticos e de compañía, tomando en consideración as propostas das entidades protectoras e avogou polo recoñecemento legal da figura do Santuario animal dotándoos dos medios necesarios.

Segundo a candidata nacionalista, o BNG incorpora “medidas novedosas como a creación de simboloxia (tipo bandeira azul) que identificaría aqueles concellos con mellores prácticas en protección e benestar animal”, asi como campañas para o fomento de espazos públicos que permitan a presenza animais: transporte, comercio, hostelaría, entre outros.